एजेन्सी । सहकारी अभियानको सर्वोच्च सम्मान रोचडेल पायोनियर्स अवार्ड यो वर्ष इन्डियन फामर्स फर्टिलाइजर कोअपरेटिभ लिमिटेड (इफ्को) का प्रबन्ध निर्देशक डा. उदय शंकर (यूएस) अवस्थीलाई प्रदान गरिएको छ । अन्तर्राष्ट्रिय सहकारी महासंघ (आईसी) ले प्रदान गर्ने सहकारी क्षेत्रको सबैभन्दा ठूलो यो सम्मान भारतको राजधानी नयाँ दिल्लीमा आयोजित अन्तर्राष्ट्रिय सहकारी सम्मेलन -२०२४ को अवसरमा डा. अवस्थीलाई प्रदान गरिएको थियो । नोभेम्बर २५ मा भारत मण्डपमा आयोजित उद्घाटन समारोहमा आईसीएका अध्यक्ष एरियल ग्वार्कोले अवस्थीलाई सम्मानित गर्नुभएको थियो ।

रोचडेल पायोनियर्स अवार्ड पाउने अवस्थी दोस्रो भारतीय सहकारी अभियन्ता हुनुहुन्छ । यसअघि अमूल दुग्ध सहकारीका संस्थापक डा.भर्गिज कुरियनले सन् २००१ मा उक्त सर्वोच्च सम्मान प्राप्त गर्नुभएको थियो । आईसीएले सन् २००० मा स्थापना गरेलगत्तै पहिलो वर्षमा कुरिनलाई उक्त सम्मान प्रदान गरिएको थियो ।

कुरिनलाई 'द मिल्क म्यान अफ इन्डिया' का रुपमा समेत सम्मानभाव प्रकट गरिन्छ । 'श्वेत क्रान्तिका पिता वा नायक' कुरियनले अमुलको अन्तर्राष्टिर्य छवि स्थापित गर्न महत्वपूर्ण योगदान पुर्याउनुभएको थियो । सन् २०१५ मा उक्त सम्मान आईसीएकी पहिलो महिला अध्यक्ष बेलायती डेम पलिन ग्रीनलाई प्रदान गरिएको थियो । यसैगरी, आईसीएका पूर्व अध्यक्ष इटालीका इभानो बार्बरेनी लगायतले पनि उक्त सम्मान प्राप्त गरिसक्नुभएको छ ।

सन् १९९३ को फेब्रुअरी १ बाट इफ्कोको प्रबन्ध निर्देशकको जिम्मेवारी सम्हाल्नुभएका अवस्थीसँग सहकारी अभियानको ५० वर्ष लामो अनुभव छ । केमिकल इन्जिनियर अवस्थीको नेतृत्व कौशलका कारण मल उत्पादनमा इफ्को विश्वको अग्रणी संस्थाका रुपमा स्थापित छ । आज इफ्कोलाई विश्व मञ्चमा परिचित गराउने कार्यमा उहाँको योगदान रहेको आईसीएले जनाएको छ ।

पुरस्कार छनौटका लागि आईसीएले एक समिति गठन गरेको थियो । इफ्कोका प्रमुख कार्यकारी अधिकृत अवस्थी सन् २०२० को सबैभन्दा प्रभावशाली भारतीयहरुको सूचीमा समेत पर्न सफल हुनुभएको थियो । सहकारी क्षेत्रबाट प्रभावशाली भारतीयको सूचीमा पर्ने अवस्थी हालसम्मको पहिलो सहकारीकर्मी समेत हुनुहुन्छ ।