एजेन्सी । सन् २०२५ दोस्रो संयुक्त राष्ट्र संघीय अन्तर्राष्ट्रिय सहकारी वर्ष (आईवाईसी–२०२५) हुने तय भैसकेको छ । यसको औपचारिक सुरुवात आगामी नोभेम्बर २५ देखि २९ सम्म भारतको राजधानी नयाँ दिल्लीमा हुने आईसीए ग्लोबल कोअपरेटिभ कन्फरेन्शको अवसरमा गरिनेछ । सहकारीको महत्व र यसको योगदान बारे विश्वको ध्यान खिच्ने उक्त कार्यक्रमको सफ्ट लञ्च भने यही जुलाई ९ मा अमेरिकाबाट गरिदैछ ।

न्यूयोर्कस्थित संयुक्त राष्ट्र संघीय मुख्यालमा ८ दिनपछि आयोजना हुने उच्चस्तरीय राजनीतिक मञ्चको दौरान दोस्रो संयुक्त राष्ट्र संघीय अन्तर्राष्ट्रिय सहकारी वर्ष कार्यक्रमको सफ्ट लञ्च हुने जनाइएको छ । सहकारी विकास तथा प्रवर्धनसम्बन्धी संयुक्त राष्ट्र संघीय समिति कोप्याक र राष्ट्र संघका लागि मंगोलियाको स्थायी नियोगको संयुक्त आयोजनामा सफ्ट लञ्च गर्न लागिएको हो । यसले आईवाईसी–२०२५ का लागि औपचारिक तयारी सुरुवात गर्नेछ । यस अवसरमा आईवाईसी–२०२५ को थिम अनावरण, मार्गचित्र र सञ्चार सामाग्रीहरु सार्वजनिक गरिने आईसीएले जनाएको छ ।