काठमाडौं । स्यूचाटार बचत तथा ऋण सहकारी संस्था लि., नागार्जुन–१०, काठमाडौंमा नेफ्स्कून द्वारा सञ्चालन गरिएको नियमित निरीक्षण तथा अनुगमन (स्क्यान) कार्यक्रम अन्तर्गत दोस्रो स्थलगत सुपरिवेक्षण जेष्ठ १३ गते सम्पन्न भएको छ ।

सहकारी संस्थाहरूमा पारदर्शिता, उत्तरदायित्व, सदस्यहितको संरक्षण, जोखिम न्यूनीकरण, सुशासन तथा दिगोपना अभिवृद्धि गर्ने उद्देश्यले संघले स्थलगत अनुगमन तथा सुपरिवेक्षण कार्यक्रमलाई प्रभावकारी रूपमा अघि बढाउँदै आएको छ ।

सुपरिवेक्षणका क्रममा संस्थाको स्तरीकरणसँग सम्बन्धित विभिन्न विषयहरू जस्तै नगद व्यवस्थापन, ऋण लगानी, मानव संसाधन व्यवस्थापन, कानुनी परिपालना, नियामकीय निकायहरूबाट जारी निर्देशनहरूको कार्यान्वयन, भाखा नाघेको ऋण असुली अवस्था लगायत संस्थाको समग्र वित्तीय अवस्था तथा सदस्यलाई उपलब्ध गराइएका सेवा सुविधाको समीक्षा गरिएको थियो ।

कार्यक्रममा संस्थाका अध्यक्ष रामेश्वर प्रसाद गौतम, सचिव कृष्णहरि खत्री, सञ्चालक सदस्य डा. बैकुण्ठ पराजुली, प्रमुख कार्यकारी अधिकृत मधुकर काफ्ले, सहायक प्रबन्धक शान्ति भट्टराई, वरिष्ठ सहायक सुवास केसी लगायत अन्य कर्मचारीहरूको उपस्थिति रहेको थियो ।

नेफ्स्कूनका कार्यक्रम अधिकृत दीपक अर्याल तथा कार्यक्रम सहजकर्ता लिला आङ्गाईद्वारा स्थलगत रूपमा प्रदान गरिएको सुझाव तथा सुधारात्मक पक्षहरूलाई संस्थाले सकारात्मक रूपमा ग्रहण गर्दै सुधारउन्मुख ढंगले कार्यान्वयन गर्ने प्रतिबद्धता व्यक्त गरेको जनाएको छ ।