रुपन्देही । नमुना महिला विकास बचत तथा ऋण सहकारी संस्था लि. को आयोजनामा “लघु व्यवसाय खेल” तालिम जेठ १३ गते सम्पन्न भएको छ । 

जेठ ११ गतेदेखि १३ गतेसम्म सञ्चालन भएको उक्त तालिम DSIK र  नेपाल बचत तथा ऋण केन्द्रीय सहकारी संघ लि. (नेफ्स्कून) को प्राविधिक सहयोगमा सञ्चालन भएको थियो ।

तालिममा सहकारीका सदस्य तथा उद्यमशीलतामा रुचि राख्ने सहभागीहरूलाई सानो व्यवसाय सञ्चालन, वित्तीय व्यवस्थापन, बजार विश्लेषण, समूह समन्वय तथा जोखिम व्यवस्थापन सम्बन्धी व्यवहारिक ज्ञान प्रदान गरिएको थियो । खेल तथा अभ्यासमा आधारित सिकाइ विधिबाट सञ्चालन गरिएको तालिम सहभागीहरूका लागि प्रभावकारी र उपयोगी बनेको आयोजक संस्थाले जनाएको छ ।

तालिमको सहजीकरण नेफ्स्कूनका अधिकृत रवीन्द्र श्रेष्ठ र यम कला सुवेदीले गर्नुभएको थियो । तालिममा ३० जनाको सहभागिता रहेको थियो ।

समापन कार्यक्रममा सहभागीहरूले तालिमबाट व्यवसाय सञ्चालन सम्बन्धी व्यावहारिक ज्ञान प्राप्त भएको, आत्मविश्वास वृद्धि भएको तथा साना उद्यम सञ्चालनमा प्रेरणा मिलेको प्रतिक्रिया दिएका थिए । आयोजक संस्थाले यस्ता क्षमता अभिवृद्धि तथा उद्यमशीलता विकाससम्बन्धी कार्यक्रमलाई आगामी दिनमा पनि निरन्तरता दिने जनाएको छ ।