मकवानपुर । मकवानपुरको हेटौंडा उपमहानगरपालिका वडा नं. २ स्थित हातेमालो बचत तथा ऋण सहकारी संस्था लि. को स्थलगत सुपरिवेक्षण मंगलबार सम्पन्न भएको छ । 

नेपाल बचत तथा ऋण केन्द्रीय सहकारी संघ लि. (नेफ्स्कून) द्वारा सञ्चालित नियमित निरीक्षण तथा अनुगमन (स्क्यान) कार्यक्रम अन्तर्गत जेठ ११ र १२ गते सुपरिवेक्षण गरिएको हो ।

सहकारी क्षेत्रमा पारदर्शिता, उत्तरदायित्व र सदस्य हितको सुनिश्चितताका लागि नेफ्स्कूनले विभिन्न सहकारी संस्थाहरूमा स्थलगत सुपरिवेक्षण कार्यलाई प्रभावकारी रूपमा अघि बढाउँदै आएको छ । सोही क्रममा दुई दिनसम्म हातेमालो साकोसमा यो कार्यक्रम सञ्चालन भएको थियो ।

सुपरिवेक्षणका क्रममा संस्थाको बचत, ऋण, लेखापरीक्षण, लगानी तथा आर्थिक कारोबारको वास्तविक स्थितिको सुक्ष्म अध्ययन गरिएको थियो । सदस्यहरूले पाउनुपर्ने सेवा सुविधा, लाभांश, समावेशी सहभागिता, संस्थाभित्र हुन सक्ने सम्भावित त्रुटि तथा आर्थिक जोखिमको विश्लेषण गर्दै व्यवस्थापकीय सुधारका लागि आवश्यक सुझावहरू समेत प्रदान गरिएको नेफ्स्कूनका कार्यक्रम अधिकृत श्यामराजा तिमल्सिनाले साकोस आवाजलाई बताउनु भयो ।

संस्थाको निर्णय प्रक्रिया, नेतृत्वको पारदर्शिता, उत्तरदायित्व र सदस्य सहभागिताको मूल्याङ्कन गर्नुका साथै प्रविधिमा आधारित सदस्य सूचना प्रणालीको अधिकतम प्रयोग मार्फत जोखिम न्यूनीकरणका उपायहरूको खोजी गर्नु सुपरिवेक्षणको मुख्य उद्देश्य रहेको थियो ।

नेफ्स्कूनका कार्यक्रम अधिकृत श्यामराजा तिमल्सिनाद्वारा गरिएको उक्त सुपरिवेक्षण कार्यक्रममा हातेमालो बचत तथा ऋण सहकारी संस्थाका सञ्चालक समिति, व्यवस्थापक तथा व्यवस्थापन तहका कर्मचारीहरूको उपस्थिति रहेको थियो ।