ललितपुर । अन्तर्राष्ट्रिय सहकारी दिवस, २०२५ भोलि अर्थात जुलाई ५ (२०८२ असार २१) का दिन (Driving Inclusive and Sustainable Solutions for a Better World) ‘समुन्नत विश्वका लागि समावेशी तथा दिगो समाधान अघि बढाउनु’ भन्ने थिमका साथ विश्वव्यापी रुपमा विशेष समारोहकाबीच मनाईंदैछ । 

आज एक पत्रकार सम्मेलन मार्फत राष्ट्रिय सहकारी महासंघले अन्तर्राष्ट्रिय सहकारी दिवस, २०२५  भूमि व्यवस्था, सहकारी तथा गरिवी निवारण मन्त्रालय र राष्ट्रिय सहकारी महासंघको संयुक्त आयोजनामा २०८२ आसर २१ गते कुपण्डोलस्थित हिमालयन होलटमा विशेष समारोहको बीच मनाईने जानकारी गराएको छ । महासंघले महिला उद्यमशीलता, युवा सहभागिता र सहकारी सुशासनलाई दिवसको मूल एजेन्डाको रुपमा प्राथमिकतामा राखिएको जनाएको छ ।

कार्यक्रममा सम्बन्धित मन्त्रालय, सरकारी अधिकारी,  सहकारीकर्मी, दातृ संस्था, उद्यमी, सञ्चारकर्मी युवा र महिलाहरु सहित देशभरबाट आमन्त्रण गरिएका करिब १५० जना सहकारीकर्मीहरुको सहभागिता रहने जनाइएको छ । दिवसले सहकारीहरुको विश्वव्यापी योगदानलाई उजागर गर्दै समावेशी, दिगो र मानवीय मूल्यमा आधारित सहकारी विकासलाई जोड दिइने जनाएको छ । 

अन्तर्राष्ट्रिय सहकारी दिवस, २०२५ विशेष समारोहको विषयमा जानकारी दिन आयोजित पत्रकार सम्मेलनमा महासंघकी अध्यक्ष ओमदेवी मल्लले प्रेस विज्ञप्ती वाचन गर्दै कार्यक्रमका विशेषताहरुबारे जानकारी गराउनुभएको थियो । 

अध्यक्ष मल्लले समारोहमा सहकारी विभागका रजिष्ट्रारद्वारा अन्तर्राष्ट्रिय थिममा आधारित कार्यपत्र प्रस्तुतीकरण रहने, हेफर इन्टरनेशनल नेपाल र महासंघको संयुक्त अध्ययन प्रतिवेदन सार्वजनिक गरिने, उद्यमशील महिलाहरुका वास्तविक कथा उनीहरुकै आवाजमा प्रस्तुत गरिने, महिला सहकारी संस्थाहरुका उत्पादनहरुको प्रदर्शनी स्टल राखिने, नीतिनिर्माताहरुद्वारा सहकारी मैत्री नीति निर्माणप्रति प्रतिबद्धता व्यक्त हुने र सहकारी क्षेत्रका उत्कृष्ट योगदान पुर्याउने संघ संस्थाहरु, कर्मचारी, पत्रकार र व्यक्तित्वहरुलाई सम्मान तथा पुरस्कार प्रदान गरिने लगायतको कार्यक्रम रहेको जानकारी गराउनुभयो । 

कार्यक्रममा महासंघका उपाध्यक्ष द्वय डिवी बस्नेत, इन्दिरा पन्त, सञ्चालकहरुमा टेकप्रसाद चौलागाई, परितोष पौड्याल, सुमन नेपाल, लगायत महासंघका कर्मचारी र पत्रकारहरुको उपस्थिति थियो । 

सहकारी दिवस २०२५ ले नाफामुखी व्यवसायका विकल्पको रुपमा सदस्य केन्द्रीत सहकारी आन्दोलनलाई विश्वव्यापी रुपमा स्थापित गर्ने अभिप्राय लिएको र नेपालमा पनि यो दिवस सहकार्य, समावेशीकरण, सुशासन र दिगोपनका आदर्शहरुलाई जीवन्त बनाउने अवसरका रुपमा लिइएको महासंघले जनाएको छ ।

१०३औं अन्तर्राष्ट्रिय सहकारी दिवस साथै यो वर्ष ३१ औं संयुक्त राष्ट्र संघीय अन्तर्राष्ट्रिय सहकारी दिवस तथा ३२ औं राष्ट्रिय सहकारी महासंघ दिवस पनि एकसाथ मनाईंदै छ । 

विश्वभर सहकारीको महत्व, उद्देश्य, सिद्धान्त, सफलता र सम्भावनाहरुबारे जनचेतना, शिक्षा, जागरण र प्रवर्द्धनका कार्यक्रमहरु गरी यो दिवस मनाउने गरिन्छ । प्रदेश र स्थानीय तहमा सञ्चालित प्रारम्भिक सहकारी संघ संस्था र विषयत प्रदेश र जिल्ला संघहरुले समेत अन्तर्राष्ट्रिय सहकारी दिवस, २०२५ विविध कार्यक्रम गरि आआफ्नै ठाउँमा मनाउने कार्यक्रमहरु रहेको पनि महासंघले जनाएको छ ।