लेटाङ, मोरङ । नेपाल बचत तथा ऋण केन्द्रीय सहकारी संघ लि.(नेफ्स्कून) को सदस्य सेवा केन्द्र लेटाङ, मोरङको आयोजनामा लेटाङमा साकोसका ऋण उपसमितिको क्षमता विकास तालिम सञ्चालन भएको छ । 

चैत्र १६ र १७ गते, दुई दिन सञ्चालन हुने उक्त तालिमको उद्घाटन नेफ्स्कून सुनसरी सदस्य सेवा कार्यालयका व्यवस्थापन उपसमिति सदस्य गोपाल बारकोटीले गर्नुभएको थियो । उद्घाटन सत्रलाई सम्बोधन गर्दै उपसमिति सदस्य बारकोटीले तालिममा सिकेका कुरा आफ्ना सस्ंथामा गएर लागु गर्न र संस्थाको दीगो विकासका निमित्त उपयोग गर्न सहभागीहरुलाई अनुरोध गर्नुभएको थियो । 

तालिममा १८ वटा बचत तथा ऋण सहकारी संस्थाबाट १० जना महिला र १५ जना पुरुष सहित २५ जनाको सहभागिता रहेको छ । तालिममा साकोसमा ऋण लगानी गर्दा ध्यानदिनुपर्नै कुराहरु, ऋण उपसमितिको काम कर्तव्य, ऋण नीति तथा ऋण विश्लेषण जस्ता विभिन्न विषयवस्तुमाथि व्यावहारिक ज्ञान प्रदान गरिनेछ । तालिमको सहजीकरण नेफ्स्कूनका तालिम अधिकृत रविन्द्र श्रेष्ठले गर्नुभएको छ । 

तालिम उद्घाटन सत्रमा सुनसरी सदस्य सेवा कार्यालयका व्यवसाय अधिकृत रामकृष्ण भट्टराई र जिल्ला बचत संघ मोरङका तालिम अधिकृत रामकुमार दाहालको समेत उपस्थिति रहेको थियो । कार्यक्रम सञ्चालन सेवा केन्द्रका इन्चार्ज गणेश भण्डारीले र व्यवस्थापन सहयोग व्यवसाय सहायक डिल्लीराम तिम्सिनाले गर्नुभएको थियो ।