काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्रप्रसाद ढकालले सहकारी अध्यादेश र नेपाल राष्ट्र बैंकले जारी गरेको मापदण्ड तथा निर्देशनको मस्यौदा तथा तिनमा साकोस अभियानको धारणा सम्बन्धमा दाङका सहकारीकर्मीहरुसँग आज अन्तरक्रियात्मक छलफल गर्नुभएको छ ।

सहकारी अभियानका साझा समस्या समाधानमा नेफ्स्कूनको बिशेष पहलकद्मी र भूमिकाबारे उहाँले विस्तृत जानकारी गराउनुका साथै दङ्गाली अभियन्ताहरुबाट रचनात्मक सुझाव समेत लिनुभएको छ भने स्थानीय अभियानका विविधि जिज्ञासाहरुको अध्यक्ष ढकालले सम्बोधन गर्नुभएको छ ।

साथै अध्यक्ष ढकालले नेफ्स्कूनकातर्फबाट स्थानीय सदस्य संघ संस्थाहरुलाई आवश्यक परामर्श समेत उपलब्ध गराउनुभएको थियो । 

स्थानीय सहकारीकर्मीहरुले कार्यक्षेत्रको आधारमा बचतको सीमा, सञ्चालकको कार्यकाल, सहकारी अभियानमा अब राष्ट्र बैंकको भूमिका र दायरा आदिबारे जिज्ञासा राख्नुभएको थियो । प्रत्युत्तरमा नेफ्स्कून अध्यक्ष ढकालले माथि उल्लिखत विषयहरुमा संशोधनका लागि सरोकारवाला तथा नियामकहरुसँग पहल भैसकेको भन्दै सकारात्मक नतिजा आउनेमा विश्वस्त तुल्याउनुभएको नेफ्स्कून दाङ सहकर्मी विष्णु जोशीले साकोस आवाजलाई जानकारी गराउनुभयो ।

यसैगरी, स्थानीय निकायसँगको नेफ्स्कूनको सम्बन्ध, सञ्जाल साझेदारी आदि समसामयिक विषयमा पनि अध्यक्ष ढकालले स्थानीय अभियन्ताहरुसँग महत्वपूर्ण छलफल गर्नुभएको थियो ।

अध्यक्ष ढकालले आज जिल्ला बचत संघ दाङ, जिल्ला सहकारी संघ दाङसँगै नेफ्स्कूनको सदस्य कलश साकोसको पनि भ्रमण गरी संस्थाको अवस्था, भावी योजनाहरु र नेफ्स्कूनको खेलेको भूमिकाबारे समेत जानकारी लिनुभएको थियो ।