काठमाडौं । काभ्रे जिल्लाको बनेपामा मुख्य कार्यालय रहेको बिन्धवासिनी बचत तथा ऋण सहकारी संस्थाले ५७ हजार बढी सदस्यहरुलाई विभेदरहित अझ गुणस्तरीय अत्याधुनिक प्रविधियुक्त सबल, सुरक्षित, दिगो, र प्रतिस्पर्धी वित्तीय तथा गैरवित्तीय सेवाहरु निरन्तर प्रवाह गर्ने प्रतिबद्धता व्यक्त गरेको छ । संस्थाको ३२ औं स्थापना दिवसको उपलक्ष्यमा सदस्य र सरोकारवालाहरुको नाममा प्रतिबद्धतामा जारी गर्दै विन्धवासिनी साकोसले समयको माग र सदस्यहरुको आवश्यकतालाई सम्बोधन गर्ने गरी सेवाहरुमा स्तरीयता र गुणस्तरीयता ल्याउने वचनवद्धता व्यक्त गरको हो । गुणस्तरीय, व्यावसायिक एवम् दिगो वित्तीय सहकारीको परिकल्पना, सदस्य समृद्धि अभियान, विन्धवासिनीको पहिचानको नारासँगै मूलतः सहकारीका विश्वव्यापी मूल्य, मान्यता र सिद्धान्तलाई शिरोपर गर्दै प्रविधिको प्रयोगमार्फत सदस्यहरुको जीवनमा सकारात्मक रुपान्तरणका लागि उत्कृष्ट वित्तीय तथा गैरवित्तीय सेवाहरु प्रदान गर्ने उसले जनाएको हो ।

 २०५० साल फागुन ६ गते तत्कालिन खोपासी र चलाल दुई गाविसलाई कार्यक्षेत्र बनाएर सानो पुँजीबाट शुरू भएको संस्थाले यस अविधमा काभ्रे जिल्लासँगै उपत्यकाका ३ वटा जिल्लाभर कार्यक्षेत्र विस्तार गरी सदस्यलाइ वित्तीय सेवा प्रदान गरिरहेको छ । २०५२ सालमा राष्ट्र बैंकबाट सीमित बैंकिङ कारोबारको अनुमति लिएसँगै संस्थाप्रतिको आकर्षण बढेर गएको दाबी प्रमुख कार्यकारी अधिकृत के वि लामा स्याङ्तानको छ ।

त्यसयता संस्थाको कार्यक्षेत्र बिस्तार गरी जिल्लाभर बनाइएको छ । सदस्यको माग बमोजिम अहिले उपत्यकामा समेत सेवा विस्तार गरिएको छ । संस्थाले वित्तीय पारदर्शिता र आर्थिक अनुशासनलाई पालना गरेकाले सदस्यहरूको विश्वास बढेर गरेको सीइओ लामाले बताउनुभयो । साकोसले सदस्यहरूलाइ पहिलो प्राथमिकतामा राखेर वित्तीय तथा अन्य सेवाहरू प्रदान गर्दै आएको छ । संस्थाको ख्याति जिल्लामा मात्र नभइ राष्ट्रिय तथा अन्तर्राष्ट्रिय स्तरमा समेत पुगेको छ ।  सहकारी मूल्य, मान्यता र सिद्धान्तका साथै नियामक निकायले जारी गरेका निर्देशन तथा मापदण्डलाइ अक्षरशः पालना गर्दै संस्था अघि बढेकाले वित्तीय अनुशासन कायम गर्न सकिएको उहाँको भनाइ छ ।

संस्थामा हाल ५७ हजार ५ सय ८९ सदस्य पुगेका छन् । ११ हजार ७७९ सय बाल बचतकर्ता छन् । संस्था राम्रो हुनुमा सञ्चालक समिति, कर्मचारी र सदस्यहरुको त्रिपक्षीय भूमिका रहने भन्दै विन्धवासिनी साकोसले १ सय ५ मिहेनती कर्मचारीमार्फत सदस्यहरुलाई सेवारत छ ।  संस्थाको ५४ करोडको हाराहारीमा शेयरपुँजी पुगेको छ । ३ अर्ब ९० करोड बचत संकलन भएको छ भने विभिन्न कोषमा ५७ करोड रुपैयाँ जम्मा भएको छ । संस्थाको कुल सम्पत्ति ५ अर्ब २२ करोड पुगेको छ । संस्था सुरक्षित रहेको प्रमाणिकरण आन्तरिक नियन्त्रण प्रणालीमार्फत मात्र नभइ बाह्य रुपमा पनि भएको दाबी उसले गरेको छ । एशियाली ऋण महासंघ (अकू) को प्राविधिक सहयोगमा नेफ्स्कूनले सञ्चालन गरेको एक्सेस ब्राण्डिङ कार्यक्रमले संस्था वित्तीय रूपमा सुरक्षित छ भन्ने कुरा प्रमाणित गरेको दाबी सिईओ लामाले गर्नुभयो । 

संस्थाले एक्सेस ब्राण्डिङ कार्यक्रममा २०६५ सालदेखि आवद्धता जनाएको छ । सिल्भर ब्राण्डसम्म पाएर बिन्धवासिनी वित्तीय रुपमा स्वस्थ छ, सदस्यलाई दिने सेवा सुविधा गुणस्तरयुक्त छ र संस्थाको हरेक क्रियाकलाप नीति, विधि र प्रविधिमा आधारित छ भन्ने उहाँको भनाइ रहेको छ । संस्थासँगै व्यवस्थापन प्रमुखका रुपमा सिईओ लामाले पनि विभिन्न राष्ट्रिय तथा अन्तर्राष्ट्रिय पुरस्कार तथा सम्मान प्राप्त गरिसक्नुभएको छ । 

२०५० साल कार्तिक २९ गते काभ्रे जिल्लाको खोपासीका स्थानीय गुरागाईंहरुले कुल देवताको पुजाको दिन एउटा संस्था स्थापना गर्ने विषयमा छलफल चलाउँदा त्यस समयमा बनेपा र धुलिखेलमा मात्रै बैंक तथा वित्तीय संस्था रहेकाले खोपासीमा वित्तीय संस्था आवश्यकता महसूस गरी सोही वर्षको पौष १२ गते एउटा विधान तयार गरेर संस्था स्थापनाको प्रक्रिया अगाडि बढाइएको इतिहास छ । ५५ जना सदस्यबाट संस्थाको शुरुवात भएको थियो । विधिवत् रुपमा २०५० साल फागुन ६ गते संस्था दर्ता गरिएको थियो । सोही दिनलाई बिन्धवासिनी साकोसले आधिकारिक रुपमा स्थापना दिवसको रुपमा मनाउँदै आएको छ । बैंक तथा वित्तीय संस्थाको उपस्थिति नभएकाले त्यहाँका जनतालाई बचत गर्न सिकाउने र ससानो ऋण लगानी गरी उद्यमशीलता विकास गर्ने उद्देश्यका साथ संस्था स्थापना भएको थियो ।