काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का बरिष्ठ उपाध्यक्ष दामोदर अधिकारीले अध्यादेशमार्फत सरकारले सहकारीहरुमा लगाएको अनावश्यक अंकुशले सदस्यको हक कुन्ठित गरेको बताउनुभएको छ । उहाँले कार्यक्षेत्रको आधारमा बचतमा सीमा तोक्ने विषय अवैज्ञानिक भएको भन्दै ऋण र बचतको सीमामा पनि तालमेल नभएको बताउनुभयो । उहाँले सञ्चालक समितिको पदमा दुई कार्यकालको भन्ने व्यवस्थाले अझ समस्या र दुविधा ल्याएको उल्लेख गर्नुभयो । 

बरिष्ठ उपाध्यक्ष अधिकारीले राज्यले ल्याएको सहकारी अध्यादेशले केही बाधाहरुसँगै केही अवसर पनि ल्याएको भन्दै बाधाहरुलाई न्यूनीकरण गर्न नेफ्स्कूनले सुझाव केन्द्रित छलफल गर्ने प्रष्ट पार्नुभयो । नेफ्स्कूनले ललितपुरको गोदाबरीमा हिजो र आजका लागि आयोजना गरेको एक्सेस दोस्रो समूहको कार्यक्रममा हिजो बोल्दै उहाँले अध्यादेश र नेपाल राष्ट्र बैंकले बचत ऋण सहकारीहरुका लागि प्रस्तावित गरेको निर्देशन तथा मापदण्डका विषयमा संवेदनशील भई सरोकारवालासँग छलफल गरिरहेका जानकारी गराउनुभयो ।

अर्को प्रसङ्मा उहाँले अहिले सिकाइलाई प्रभावकारी बनाउन पाम वर्कशपको विधि परिवर्तन गरिएको भन्दै कार्यशालामा बस्दै गर्दा प्रत्येक सहभागीले आफ्नो संस्थालाई प्रस्तुतिमा पाउने दाबी गर्नुभयो । बरिष्ठ उपाध्यक्ष अधिकारीले भन्नुभयो,  'हामी समस्या समाधानमा केन्द्रित छलफल गर्नेछौ । तपाइहरुले पनि यहाँ बस्दै गर्दा संस्थामा समाधान बोकेर जानु पर्नेछ । तपाइले मासिक रुपमा पठाएका विववरणको अफसाइट र अनसाइट सुपरिवेक्षण गरिरहेका छौ ।'

अहिलेको समयमा सबैको ऐक्यबद्धता आवश्यक भएको भन्दै उहाँले भन्नुभयो, 'अहिले ऋण असुली भएको छैन् थप लगानी भएको छैन । तरलता अधिक बसेको छ । हमी आतिन पनि र मात्तिन पनि सक्ने अवस्था छैन । समुदायमा जब जब संकट आउँछ त्यसले सँगसगै सम्भावना पनि साथसाथै ल्याएको हुन्छ । त्यसैले नीति विधि र प्रविधिमा आधारित भइ संस्था सञ्चालन गरिएमा हामी यो संकटको सहजै सामना गर्न सक्दछौ ।'