काठमाडौं । भक्तपुर चाँगुनारायणस्थित नालाछाप प्रगतिशिल महिला साकोसको चार वर्षीय रणनीतिक व्यावसायिक योजना निर्माण कार्यशाला सिन्धुपाल्चोकको भोटेचौरमा सम्पन्न भएको छ । साकोसले आर्थिक वर्ष २०८२।०८३ देखि २०८५।०८६ सम्मका लागि योजना निर्माण गरेको हो । २०८१ माघ ११ देखि १३ गतेसम्म आयोजित कार्यशालामा १७ जनाको सहभागिता थियो । नेफ्स्कूनले सञ्चालन गरेको जोखिममा आधारित साकोस सुपरिवेक्षण (कर्ब्स) कार्यक्रममा आवद्ध साकोसको कुल सम्पत्ति ११ करोड ६५ लाख बढी छ ।

संस्थाकी अध्यक्ष मिरा वाग्लेको अध्यक्षतामा आयोजित कार्यक्रमको समापन सत्रमा नेफ्स्कून सञ्चालक मन्दरा मिश्रले नालाछाप साकोसले अब आफ्नो एउटा निश्चित बाटो तय गरेको भन्दै बधाई दिनुभयो । उहाँले निकै दुख र परिश्रमले संस्था यस अवस्थामा आइपुगेको भन्दै योजना कार्यान्वयनले अब थप सफलताको मार्ग प्रशस्त गर्ने विश्वास व्यक्त गर्नुभयो ।  त्यसका लागि योजनाको प्रभावकारी कार्यन्वयनमा मिश्रको जोड थियो । उहाँले सहकारीको सफलताका लागि सञ्चालक समिति, कर्मचारी र सदस्यहरुमा एकता हुनुपर्ने भन्दै सदस्य केन्द्रित भएर संस्था सञ्चालन गर्न सुझाव राख्नुभयो ।

यसैगरी, उहाँले उद्यमशीलतालाई जोड दिएर काम गर्नुपर्ने आवश्यकता पनि औंल्याउनुभयो । त्यसका लागि नालाछाप साकोसलाई स्थानीय तह, छाता संघ लगायतसँग नियमित सहकार्य गर्न पनि उहाँले आग्रह गर्नुभयो ।

अर्को एक प्रसङ्मा नेफ्स्कून सञ्चालक मिश्रले सरकारले बचत तथा ऋण सहकारीको नियमनका लगि ल्याएको अध्यादेशका केही प्रावधानहरु संशोधनका लागि नेफ्स्कूनले पहल गरिरहेको पनि जानकारी गराउनुभयो । 

समापन सत्रमा संस्थाकी अध्यक्ष मिरा वाग्लेले कार्यशाला सोचेभन्दा राम्रो भएको प्रतिक्रिया व्यक्त गर्दै कार्ययोजना कार्यन्वयनको प्रभावकारितामा साकोसको सफलता भरपर्ने बताउनुभयो । उहाँले रणनितिक व्यावसायिक योजनालाई सबैले आ आफ्नो तह बाट कार्यन्वयन गर्दा पक्कै सफलता प्राप्त हुने विश्वास पनि व्यक्त गर्नुभयो ।

समापन कार्यक्रम सञ्चालन संस्थाकी सचिव सरिता थापाले गर्नुभएको थियो । कार्यशाला सहजीकरण नेफ्स्कूनका बरिष्ठ अधिकृत कोमलराज अधिकारी तथा अधिकृत श्यामराजा तिमल्सिनाले गर्नुभएको थियो ।