पोखरा । नेफस्कूनले गण्डकी पहिलो क्लष्टरको पहिलो कार्यकुशलता तथा सिकाइ व्यवस्थापन कार्यशाला (पाम) आज २०८१ मंसिर १७ गते पोखरामा सञ्चालन गरेको छ । कार्यशालामा २८ वटा संस्थाबाट प्रतिनिधित्व रहेको छ । नेफ्स्कूनले 'पाम' सञ्चालन शैलीमा गरेको परिमार्जनपछिको प्रोवेसन गण्डकी पहिलो क्लष्टरको यो पहिलो कार्यशाला हो ।

कार्यशालाको उद्घाटनमा नेफ्स्कूनको संचालक सदस्य कमला देवी गिरीले अहिले सहकारी अभियानमा ऐक्यबद्धताको खाँचो औंल्याउनुभयो । संस्थागत शुसासन तथा वित्तीय सुस्वास्थ्य कायम गर्न प्रेवेशन कार्यक्रम महत्वपूर्ण रहेको बताउँदै उहाँले अभियानमा प्रश्न चिन्ह खडा नहुने गरी काम गर्नपर्ने बताउनुभयो । साथै उहाँले पाम सञ्चालनको शैलीमा परिमार्जन गरिएको बताउँदै संस्थागत सुशासन, वित्तीय स्वास्थ्य र सहकारीको छवि निर्माणमा सबैको भूमिका आवश्यक भएको बताउनुभयो । अभियानमाथि हिलो छ्याप्ने काम भैरहेको समयमा अहिले सबै एकजुट भएर अगाडि बढ्नुपर्नेमा सञ्चालक गिरीको विशेष जोड थियो । उहाँले शुसासनको परिपालनासहित नीति विधिको परिधिभित्र नरही सहकारी संचालन गर्दा समस्यामा आएको बताउँदै यस कार्यक्रमले उक्त कुराहरु सुधार हुने दाबी गर्नुभयो ।  

साथै उहाँले पुस ५ र ६ गते बुटवलमा आयोजना हुने नेफ्स्कूनको ३३औं वार्षिक साधारण सभामा यो क्लष्टरको तर्फबाट उत्साहजनक सहभागिताको लागि आग्रह समेत गर्नुभयो । 

कार्यक्रममा संघको पोखरा सदस्य सेवा  व्यवस्थापन उपसमितिका सदस्यहरु, संघका पूर्व सञ्चालक एवम् पोखरा रोयल साकोसका प्रमुख कार्यकारी अधिकृत भीम गुरुङ लगाएत २८ वटा साकोसवाट ५५ जनाको सहभागिता छ । कार्यक्रममा ऋणका कागजात व्यवस्थापन र ऋणको कानुनी प्रकृयाको बिषयमा संघका कानुनी सल्लाहकार अधिवक्ता शिब अधिकारीले सहजीकरण गर्नुभएको छ ।

यसैगरी, संघका सहायक कार्यकारी अधिकृत दुर्गा प्रसाद ढकाल र  बरिष्ठ अधिकृत भरत प्रसाद न्यौपानेले सुचकहरुमा छलफल गर्नुभएको छ । कार्यक्रम संचालनका क्रममा संघका कार्यक्रम अधिकृत बिनोद ढकालले सबै साकोसको पल्स सुचकहरुबारे प्रस्तुति गर्नुभएको थियो । कार्यक्रममा संघका कार्यक्रम अधिकृत मनोज खडका, व्यवसाय अधिकृत सुरज चालिसेको समेत सहभागिता छ । कार्यक्रम रोयल दिदीबहिनी किचन, बुद्धचोक पोखरामा सञ्चालन भइरहेको छ ।