एजेन्सी । भारतीय प्रधानमन्त्री नरेन्द्र मोदीले संयुक्त राष्ट्र संघीय अन्तर्राष्ट्रिय सहकारी वर्ष २०२५ को औपचारिक एवम् विधिवत् शुभारम्भ गर्नुभएको छ । नयाँ दिल्लीस्थित भारत मण्डपमा आयोजित अन्तर्राष्ट्रिय सहकारी सम्मेनल-२०२४ को उद्घाटन समारोहको अवसरमा प्रधानमन्त्री मोदीले सन् २०२५ लाई अन्तर्राष्ट्रिय सहकारी वर्ष मनाउने संयुक्त राष्ट्र संघको घोषणालाई औपचारिक रुपमा सुरु गर्नुभएको हो । 'Cooperative Build a Better World' भन्ने थिमका साथ विश्वभर सन् २०२५ लाई अन्तराष्ट्रिय सहकारी वर्षको रुपमा मनाइँदैछ ।

आज आयोजित कार्यक्रममा प्रधानमन्त्री मोदीले रिमोटमार्फत अन्तर्राष्ट्रिय सहकारी वर्ष २०२५ को आधिकारिक लोगो तथा थिम अङ्कित डिजिटल ब्यानर सार्वजनिक गर्नुभएको हो । यो सँगै अब दोस्रो अन्तर्राष्ट्रिय सहकारी वर्षको आधिकारिक सुरुवात भएको छ भने सन् २०२५ लक्षित विविध कार्यक्रमहरु समेत सार्वजनिक गर्ने बाटो खुलेको छ । यसअघि सन् २०१२ लाई पहिलो पटक अन्तर्राष्ट्रिय सहकारी वर्षका रुपमा वर्षभरि सहकारी अभियानसम्बन्धी सचेतना, जागरण, प्रर्वधनात्मक आदि कार्यक्रम गरी मनाइएको थियो ।