काठमाडौं । मोरङको दौतरी बलिया बचत तथा ऋण सहकारी संस्था लि. को ५ औं वार्षिक साधारण सभा संस्थाका अध्यक्ष उमेश वस्तीको अध्यक्षता तथा नेपाल बचत तथा ऋण केन्द्रिय सहकारी संघ लि. (नेफ्स्कून) का महासचिव घनश्याम अधिकारीको प्रमुख अतिथ्यतामा मंसिर १ गते सम्पन्न भएको छ । सभामा नेफ्स्कून सञ्चालकहरु लक्ष्मी सापकोटा तथा शालिग्राम ढकालसँगै पूर्व महासचिव घनश्याम खतिवडा लगायतको आतिथ्यता थियो । 

सभामा नेफ्स्कूनका महासचिव अधिकारीले पूर्वकै सर्वोकृष्ट संस्था भएकाले बचत कर्ताको हकहितका काममा अगाडि बढेर सेवा मुलक कार्य गर्दै संस्थाले राम्रा काम गरेर देखाउन आवश्यक रहेको बताउनुभयो । साथै उहाँले सदस्य मैत्री सेवामा विशेष जोड दिन पनि आग्रह गर्नुभयो ।

यसैगरी, नेफ्स्कूनका पूर्व महासचिव खतिवडाले सहकारीहरूलाई दिगो र भरपर्दो बनाउँदै लैजान सहकारीका पदाधिकारीहरूको महत्त्वपूर्ण भूमिका रहने धारणा राख्नुभयो ।  संस्थाको २५ करोड ९१ लाख बढी पूँजी रहेको छ ।

उद्घाटन कार्यक्रममा नेफ्स्कूनका सञ्चालक सदस्य शालिकराम ढकाल, प्रदेश बचत तथा ऋण सहकारी संघ कोशी प्रदेशका अध्यक्ष हरिप्रसाद सुवेदी, सुन्दरहरैचा नगरपालिका वडा नं. ४ का वडाध्यक्ष तथा संस्थाका निवर्तमान कोषाध्यक्ष कैलाश बस्नेतले संस्था सम्बन्धी आफ्ना विचार व्यक्त गर्नुभएको थियो ।

सभामा दौतरीबलिया साकोसका अध्यक्ष उमेश वस्तीले २०८०/८१ को वार्षिक प्रतिवेदन तथा नीति कार्यक्रम बजेट प्रस्तुत गर्नुभएको थियो । संस्थाको प्रगति प्रतिवेदन संस्थाका सचिव रामकुमार कालाखेतीले प्रस्तुत गर्नुभएको थियो । 

साकोसले आफ्नो अनलाइन बैङ्किङ खाताबाट सेयर सदस्यलाई सरल तरिकामा सेवा प्रदान गर्दै आएको छ ।  सभामा जिल्ला बचत तथा ऋण सहकारी संघका कोषाध्यक्ष डी. बी. थापा, सुन्दरहरैचा नगरपालिका वडा नं. ५ का वडाध्यक्ष गणेश चौधरी, साकोसको सञ्चालक तथा लेखा सुपरिवेक्षण समिति, उपसमिति, कर्मचारी तथा सदस्यहरुको बाक्लो उपस्थिति थियो ।