भक्तपुर । भक्तपुर जिल्ला बचत तथा ऋण सहकारी संघले अर्धबार्षिक समिक्षा सम्पन्न गरेको छ । संघका अध्यक्ष कृष्ण गोविन्द लाखाजुले संघले वर्तमान अवस्थामा सदस्यको सम्बन्धलाई प्राथमिकता दिई सदस्य सक्षमता बृद्धि र सदस्य अनुगमनमा जोड दिइएको  बताउनुभयो ।

उहाँले संघको पाउनुपर्ने अग्रिम व्याजकर फिर्ताका लागि पहल गर्ने, स्थानीय तहसंग समन्वय र सहकार्यलाई बढाउनुपर्ने, संघको नियमित बचत र शेयर पुँजी बृद्धि गर्नुपर्ने लगायतको विषयमा जानकारी गराउनुभयो । संघका उपाध्यक्ष हरि बल्लले संघले दिइने तालिम संस्थाको कार्यान्वयन तहमा नपुगेको संस्थाको अनुगमनमा नदेखिएकोले संघले तालिम दिएका सहभागीहरु संस्थामै कार्यरत भए नभएको समीक्षा गर्नुपर्ने  बताउनुभयो ।

सचिव जगनाथ प्रजापतिले संघको प्रगतिबारेमा समीक्षा प्रस्तुत गर्दै कार्यक्रम प्रगतिका लागि उपसमितिहरुको बैठक बसाएर क्रियाशिल हुनुपर्ने उल्लेख गर्नुभयो । कोषाध्यक्ष कान्छा भक्त घजुले २०८० पुष मसान्तसम्ममा प्राप्त वित्तीय प्रगतिको समीक्षा प्रस्तुत गर्नुभएको थियो । 

 २०८० पुष मसान्तसम्म गत बर्षको बासलातको तुलनामा २२ प्रतिशत बृद्धि भई कुल वासलात २ अर्ब ७२ करोड ५२ लाख  ५१ हजार र २ करोड ५ लाख नाफा गर्न सकेको प्रगति विवरण प्रस्तुत गरिएको थियो ।  संघका लेखा सुपरिवेक्षण समिति संयोजक बालमुकुन्द उपाध्यायले संघको ऋण लगानीलाई बृद्धि गर्नुपर्नेमा जोड दिदै संस्थाले सफ्टवेयरमार्फत लेखा व्यवस्थापन गर्ने वर्तमान परिपक्ष्यमा स्टेशनरी बिक्रीको लक्ष्य र ई-बुलेटीन प्रकाशनतर्फ जानुपर्ने सुझाव राख्नुभयो ।

संघका व्यवस्थापक बालकृष्ण धोजुले संघको सदस्यता र ऋण लगानी बृद्धिको लागि प्रभावकारी पहल गर्नुपर्ने  बताउनुभयो । उहाँले ९ प्रतिशत व्याजदमा नै संघले ५ बर्षको लागि मासिक किस्ताबन्दी ऋण लगानी गरिरहेकोले सदस्य संस्थाले मंहगो व्याजदरमा निक्षेप संकलन गर्न आवश्यक नरहेको जानकारी गराउनुभयो । वित्तीय बजारमा अधिक तरलता रहेको अवस्थामा ऋण लगानीको क्षेत्र पहिचान गरी सुक्षित ऋण लगानीमा जोड दिनुपर्ने उहाँको भनाइ थियो । समीक्षा कार्यक्रममा संघको समिति, उपसमिति र कर्मचारी गरी ४४ जनाको उपस्थिति थियो । समीक्षाबाट प्रस्तुत प्रतिवेदनमाथि छलफल गरी सुझावहरु समेत संकलन गरिएको थियो ।