दोलखा ।  जिल्लाका ९ वटा स्थानीय तह मध्ये तामाकोशी गाउँपालिकाले सहकारी क्षेत्रको विकास, प्रवर्धन र सुशासनका लागि महत्वपूर्ण कार्य सञ्चालन गर्दै आएको छ । २०८० माघ २१ गते आइतबार गाउँपालिकाको सहकारी शाखाले 'सहकारी क्षेत्रमा देखिएका समस्या समाधानका लागि  गाउँपालिका र सहकारी अभियानको भूमिका' विषयक छलफल कार्यक्रम सम्पन्न गरेको छ । 

गाउँपालिका भित्र सञ्चालित ३१ वटा सहकारी संस्थाका अध्यक्ष वा प्रतिनिधि  तथा संस्थाका व्यवस्थापकहरुसहित ८६ जनाको उपस्थिति रहेको उक्त कार्यक्रममा सहकारी क्षेत्रमा मौलाउदै गएको विकृति निरुत्साहित गर्न अभियान र गाउँपालिकाको तर्फबाट मिलेर कार्य गर्ने लगायतका विषयमा छलफल गर्दै विभिन्न १४ वटा विषयमा प्रतिवद्धतासहित सहकारी क्षेत्रको मर्म, भाव र कानुनको परिपालनासहित सहकारीका सदस्यलाई सुशासन सहितको प्रभावकारी सेवा प्रदान गर्ने विषयमा सहभागीहरुले प्रतिवद्धतासहित ऐक्यबद्धता जाहेर गर्नुभएको थियो ।

कार्यक्रममा तामाकोशी गाउँपालिका स्तरीय सहकारी समन्वय समितिका संयोजक परशुराम कार्कीको अध्यक्षता रहेको थियो भने प्रमुख अतिथि गाउँपालिकाका अध्यक्ष प्रोण प्रताप केसी, विशेष अतिथिहरु गाउँपालिकाका उपाध्यक्ष सिर्जना सुवेदी, बागमती प्रदेश बचत तथा ऋण सहकारी संघ (प्रोस्कून) का महासचिव जिवसराज खड्का, जिल्ला सहकारी संघ दोलखाका अध्यक्ष देवि प्रसाद शर्मा, जिल्ला बचत संघका अध्यक्ष भूमिराज खड्का, प्रमुख प्रशासकीय अधिकृत बद्री प्रसाद शर्मा वाग्ले रहनुभएको थियो भने अतिथिहरुमा वडा अध्यक्षहरु, कार्यपालिका सदस्यहरु विभिन्न सञ्चारकर्मीहरु रहनुभएको थियो ।