विश्व क्रेडिट युनियन सम्मेलन–२०२४ मा सहभागिताका लागि नाम दर्ता खुला गरिएको छ । विश्वभरका वित्तीय सहकारीहरुको छाता संगठन विश्व ऋण परिषद् (ओकू) र अमेरिकी क्रेडिट युनियनहरुको छाता संगठन-क्रेडिट युनियन नेशनल एशोसिएन (क्यूना) ले संयुक्त रुपमा आयोजना गर्न लागेको उक्त सम्मेलन अमेरिकाको बोस्टनमा आगामी जुलाई २१ देखि २४ सम्म हुँदैछ । क्यूना विश्व ऋण परिषद्को प्रत्यक्ष सदस्य हो । बोस्टन शहरको बोस्टन कन्भेन्सन सेन्टरमा आयोजना हुने सम्मेलनको दौरान ओकूको वार्षिक साधारण सभा, ओकू अन्तर्गत क्रेडिट युनियनमा आवद्ध महिलाहरुको सञ्जाल ग्लोबल विमिन लिडरशीप नेटवर्क (जीडब्लूएलएन) र युवाहरुको सञ्जाल डब्लूवाईसीयूपीसँगै क्रेडिट युनियनका जल्दाबल्दा विषयहरुमा प्लेनरी र ब्रेकआउट सेसन सञ्चालन हुने जनाइएको छ । विश्व क्रेडिट युनियन विश्वभरका बचत तथा ऋण सहकारी अभियानको महाकूम्भ हो । यो सम्मेलन सिकाइ तथा अनुभव आदानप्रदानसँगै सम्बन्ध विकास र विस्तार गर्ने साझा थलो समेत हो । ओकूले वेबसाइट तथा आफ्ना सामाजिक सञ्जालमार्फत आगामी वर्षको सम्मेलनका लागि सहभागी हुन आग्रह गर्दै रजिष्ट्रेशन खुला गरिएको जनाएको हो ।

सन् २०२३ को विश्व क्रेडिट युनियन सम्मेलन जुलाई २३ देखि २६ सम्म क्यानाडाको भ्यानकूभर शहरमा आयोजना गरिएको थियो । सहभागिताका हिसाबले ऐतिहासिक रहेको उक्त सम्मेलनमा ओकूको प्रत्यक्ष सदस्यको रुपमा नेपाल बचत तथा ऋण केन्द्रीय सहकारी संघ लि. का तर्फबाट पनि सहभागिता जनाइएको थियो ।