काठमाडौं । नेफ्स्कूनको आयोजना र युएस्एड (USAID) को सहयोगमा अन्तरलगानी नीति तथा प्रोडक्ट तयारी अन्तरक्रिया तथा कार्यशाला काठमाडौंमा शुरु भएको छ । श्रावण २९ र ३० गते सञ्चालन हुने दुई दिवसीय कार्यशालामा संघका पदाधिकारी, सञ्चालक समिति सदस्यहरु, उच्च व्यवस्थापन र युएस्एडका प्रतिनिधिहरुको सहभागिता रहेको छ । संघ र युएसएडबीचको सहयोगात्मक प्रयासबाट मुख्यतया अनुदान सहायता मार्फत लक्षित क्षेत्रहरूमा नेपाली उद्यमहरूको प्रतिस्पर्धात्मकता र उत्पादकत्वमा सुधार गर्नु रहनेछ । 

संघका अध्यक्ष परितोष पौड्यालको अध्यक्षतामा कार्यशालाको औपचारिक उद्घाटन भएको थियो । अध्यक्ष पौड्यालले ऋणको सदुपयोगितासँगै स्थानीय उत्पादन,  कृषि तथा पर्यटन विकास र डिजिटल सेवाहरू जस्ता उच्च मूल्यको निर्यात बढाउन र विविधीकरण गर्न नेपालको महत्वाकांक्षालाई अगाडि बढाउन कार्यशाला महत्वपूर्ण रहने स्पष्ट पार्नुभयो । संघले युएस्एडसँगको सहकार्यबाट नयाँ रणनीतिक मार्गचित्र तयार गरि उपयुक्त अन्तरलगानी नीतिहरूको मस्यौदा निर्माणमा दुईदिवसीय कार्यशाला केन्द्रित रहने जनाएको छ ।

गत असार ८ गते संघ र युएसएड ट्रेड एण्ड कम्पिटिटिभ्नेसबीच सहयोग पत्र (LOC)  मा हस्ताक्षर भएको थियो । संघ र युएस्एड बीचको सहयोगात्मक प्रयासको उद्देश्य मुख्यतया अनुदान सहायता मार्फत लक्षित क्षेत्रहरूमा नेपाली उद्यमहरूको प्रतिस्पर्धात्मकता र उत्पादकत्वमा सुधार गर्नु रहेको छ ।  

कार्यक्रममा स्वागत मन्तव्य संघका महासचिव दामोदर अधिकारीले र कार्यक्रम सन्दर्भबारे समिक्षा बरिष्ठ उपाध्यक्ष चन्द्रप्रसाद ढकालले गर्नुभएको थियो ।  कार्यशालामा विषयविज्ञ नरबहादुर थापाले अन्तरलगानी नीति विषयक मस्यौदा प्रस्तुतीकरण गर्नुभएको थियो भने सो विषयको प्रस्तुतीकरणमाथि सहभागीहरुबीच अन्तरक्रिया तथा टिप्पणी गर्ने काम भएको थियो । कार्यक्रम सञ्चालन सहायक कार्यकारी अधिकृत एवं सदस्य सेवा विभाग प्रमुख गणेशप्रसाद तिमल्सिनाले गर्नुभएको थियो ।