भक्तपुर । नेपाल बचत तथा ऋण केन्द्रीय सहकारी संघ लि.(नेफ्स्कून) को चालु आर्थिक वर्षको नीति, कार्यक्रम तथा बजेट सम्बन्धी अभिमुखीकरण एवं क्षमता विकास तालिम भक्तपुरमा बिहीवारदेखि सञ्चालन भएको छ । 

संघको ३ सय १५औं सञ्चालक समिति बैठकले गरेको निर्णय अनुरुप आ.व. ०८०/०८१ को नीति, कार्यक्रम तथा बजेट सम्बन्धी अभिमुखीकरण र व्यवस्थापकीय क्षमता विकास सम्बन्धी तालिम प्रदान गर्ने उद्देश्यसहित कार्यक्रम आयोजना भएको हो । 

नेफ्स्कूनका कार्यवाहक अध्यक्ष चन्द्रप्रसाद ढकालले उद्घाटन गर्नुभएको कार्यक्रममा संघका सञ्चालक जिवसराज खड्काले शुभकामना मन्तव्य र लेखा सुपरिवेक्षण समितिका संयोजक नवराज सापकोटाले मार्गनिर्देशनात्मक अभिव्यक्ति दिनुभएको थियो । 

कार्यक्रममा संघका व्यवस्थापन प्रमुख, विभागीय प्रमुखहरु लगायत सदस्य सेवा कार्यालयका प्रमुखहरु र व्यवसाय विभाग एवं वित्त तथा समान्य सञ्चालन विभागका अधिकृत स्तरका कर्मचारीहरुको सहभागिता रहेको छ । कार्यक्रम ३ दिनसम्म सञ्चालन हुनेछ ।