कोशी प्रदेश । पूर्वी पहाडी जिल्ला धनकुटा र भोजपुरमा सञ्चालित सहकारी प्रतिनिधिहरुबीच नेफ्स्कून अन्तरक्रिया सम्पन्न भएको छ ।  कार्यक्रम नेफ्स्कूनका कार्यवाहक अध्यक्ष चन्द्रप्रसाद ढकाल र नेफ्स्कून सञ्चालक एवम् सुनसरी सदस्य सेवा कार्यालय व्यवस्थापन उपसमिति संयोजक गोमा नेपालको उपस्थितिमा भएको थियो । श्रावण ८ गते धनकुटामा आयोजित सहकारी अभियानका समसामयिक विषय लक्षित अन्तरक्रिया कार्यक्रममा जिल्ला सहकारी संघ धनकुटाका अध्यक्ष खगेन्द्र सुवेदी, तेह्रथुमका अध्यक्ष छत्रप्रसाद रिमाल लगायत २७ जना सहकारी प्रतिनिधिहरुको उपस्थिति रहेको थियो । त्यसैगरि श्रावण ९ गते भोजपुर बजारमा सञ्चालित अन्तरक्रिया कार्यक्रममा जिल्ला बचत संघ भोजपुरका अध्यक्ष भरत ताम्राकार लगायत १९ जना सहकारी प्रतिनिधिहरुको उपस्थिति रहेको थियो ।

नेफ्स्कूनका कार्यवाहक अध्यक्ष ढकालले साकोस र नेफ्स्कूनको सामिप्यतालाई कसरी अझै नजिक बनाउनु सकिन्छ सो बारे सुझाव दिन अनुरोध गर्नु हुदै दुबै जिल्लाका सबै साकोसहरुले अभियानमा सँगसँगै यात्रा गर्न सकेमा मात्र एकता बलियो हुने विचार व्यक्त गर्नु भयो । साकोसहरुलाई सुरक्षित र दिगो बनाउन गुणस्तर सुनिश्चितता कार्यक्रममा अनिवार्य सहभागी भई साकोसको जोखिम न्यूनीकरणमा लाग्न अनुरोध गर्नुभयो । उहाँले मन्तव्यको क्रममा अवको आवश्यकता नेतृत्वको साझा बुझाई सहितको ऐक्यवद्धता रहेको र सो को कार्यान्वयन साकोस अभियानबाट पूर्ण रुपमा हुनु पर्ने भएकोले सबैले कार्यान्वयन गर्नु पर्ने बताउनुभयो ।

कार्यक्रममा नेफ्स्कूनकी सञ्चालक गोमा नेपालले साकोस अभियानमा हाल देखिएका समस्याहरुको चर्चा गर्दै साकोस अभियानमा भएका राम्रा विषय एवम् पक्षलाई सदस्य माझ पुर्याउनु पर्ने बताउदै नियामक निकायमा क्षमता विकासको आवश्यकता भएको र सो नेफ्स्कूनले विकास गरी कार्यान्वयनमा ल्याइसकेको आधारशिला कार्यक्रम धनकुटा र भोजपुर जिल्लाका सबै पालिकाहरुमा समन्वय गर्न समेत अनुरोध गर्नु भयो । उत्साजनक उपस्थितिको लागि साकोस अभियान कर्मीहरुलाई हार्दिक धन्यवाद एवम् थप सफलताको शुभकामना व्यक्त गर्नु भएको थियो ।

अन्तरक्रियामा सहभागी सहकारी प्रतिनिधिहरुले हालका समस्या, चुनौति र समाधानका उपायहरु बारे आ–आफ्नो अनुभव र सुझावहरु राख्नु भएको थियो ।