भक्तपुर । सिद्धि गणेश बचत तथा ऋण सहकारी संस्था लिमिटेड भक्तपुरले संस्थाका १ सय १५ जेष्ठ सदस्यहरुलाई सम्मान गरेको छ । साकोसले ७० बर्ष नाघेका १ सय १५ जना जेष्ठ सदस्यहरुलाई सोमबार आयोजित एक कार्यक्रमका बीच सम्मान गरेको हो । 

कार्यक्रमका प्रमुख अतिथि नेपाल मजदुर किसान पार्टीका अध्यक्ष नारायणमान विजुक्छेंले साकोसका जेष्ठ सदस्यहरुलाई दोसल्ला ओढाई सम्मान गर्नुभएको थियो ।

सिद्धि गणेश साकोसले संस्थामा आबद्ध जेष्ठ सदस्यहरुलाई २०७० सालबाट नियमित रुपमा जेष्ठ सदस्य सम्मानको कार्यक्रम आयोजना गर्दै आइरहेको छ । 

प्रमुख अतिथि विजुक्छेंले ज्येष्ठ सदस्यहरुको उचित स्याहारसुसारका लागि आदर निकेतनको आवश्यकताबारे चर्चा गर्नुभयो । अहिले परिवारका सदस्यहरु सवैजना व्यस्त रहने भएकाले परिवारका ज्येष्ठ सदस्यहरुलाई उचित स्याहारसुहार गर्ने समस्या भएको उहाँंले बताउनुभयो । त्यसकारण ज्येष्ठ सदस्यहरुको उचित स्याहारसुसारका लागि आदर निकेतन सञ्चालन गर्नुपर्ने भनाई उहाँले राख्नुभयो । 

कार्यक्रममा ख्वप अस्पताल च्याम्हासिंह भक्तपुरका संयोजक डा रत्नसुन्दर लासिवाले सहभागी ज्येष्ठ सदस्यहरुलाई स्वास्थ्य हेरविचारका विभिन्न पक्षहरुबारे जानकारी गराउनुभयो । उहाँंले समयमै उपचार गरे रोगको निदान हुने भन्दै यसतर्फ सवैजना ज्येष्ठ सदस्यहरुलाई सचेत रहन आग्रह गर्नुभयो । साथै निरोगी बन्नका लागि उचित खानपान संगै शारिरीक व्यायाम र खुशी हुन पनि त्यति नै जरुरी रहेको बारेमा जानकारी गराउनु भयो ।

संस्थाका अध्यक्ष रुद्रनारायण लाखाको सभापतित्वमा भएको उक्त कार्यक्रममा उपाध्यक्ष विष्णुराम दुमरुले स्वागत मन्तव्य राख्नुभएको थियो । कार्यक्रम संस्थाका सचिव विष्णुप्रसाद दुमरुले सञ्चालन गर्नुभएको थियो । कार्यक्रममा ८० ज्येष्ठ सदस्यहरुले सामान्य स्वास्थ्य परिक्षण गर्नुभएको थियो ।