ललितपुर । सहकारीका सम्बेदनशील सवालमा राज्यको ध्यानाकर्षण गराउने उद्देश्यले राष्ट्रिय सहकारी महासंघको नेतृत्वमा चैत्र २० गते माइतीघर मण्डलामा कोणसभा गरिने भएको छ । उपत्यका भित्रका सम्पूर्ण सहकारीकर्मीहरुलाई सभामा सहभागिताका लागि पत्राचार सहित महासंघले आव्हान समेत गरेको छ । वि.सं.२०१३ साल चैत्र २० गते चितवनमा बखानपुर ऋण सहकारी समिति स्थापना भएको दिनलाई स्मरण गर्दै नेपालको सहकारी अभियानले विविध कार्यक्रमको आयोजना गरी ६६औं राष्ट्रिय सहकारी दिवस मनाउन गइरहेको हो । सो अन्तर्गत महासंघले विहान ७ बजे उपत्यकाका विभिन्न ठाउँबाट सद्भाव र्यालीसहित माइतीघर मण्डलामा कोणसभा आयोजना गर्ने जनाएको छ ।

‘सहकारीको दिगोपनः स्वनियमन र सुशासन’ भन्ने यस बर्षको थिमलाई सार्थक बनाउन ६६औं राष्ट्रिय सहकारी दिवसको कार्यक्रम देशव्यापी बनाउन महासंघले सहकारी संघ संस्थाहरुलाई आव्हान गरेको हो । महासंघले काठमाडौं, ललितपुर र भक्तपुरका सम्पूर्ण सहकारी संघ संस्थाका कार्यालयहरु विदा गरि सक्रिय रुपमा कार्यक्रममा सहभागिताका लागि आव्हान गरेको छ भने देशैभरि राष्ट्रिय सहकारी दिवसका कार्यक्रम गरि त्यसको जानकारी महासंघमा गराउन समेत अनुरोध गरेको छ ।

६६औं राष्ट्रिय सहकारी दिवसको अवसर पारेर आयोजना गर्न लागेको कोणसभाले सहकारी क्षेत्रको विकास र प्रवद्र्धनका लागि राज्यका जिम्मेवार निकायहरुको ध्यानाकर्षण गराउने उद्देश्य रहेको महासंघले जनाएको छ । सभामा सक्रिय सहभागिताका लागि उपत्यकाका विभिन्न ठाउँहरुबाट विहान ७ बजे सद्भावपूर्ण र्याली सहित माइतीघर मण्डलामा उपस्थित हुन सम्पूर्ण सहकारीकर्मीहरुमा अनुरोध गरेको छ ।