भक्तपुर । जिल्ला बचत तथा ऋण सहकारी संघ लि.भक्तपुरको भक्तपुर नगर सहकारी समन्वय उपसमितिको आयोजनामा “सहकारी विभागबाट जारी ३५ बुँदे निर्देशन, COPOMIS र goAML विषयक नगरस्तरिय अन्तरक्रिया कार्यक्रम भक्तपुरमा शनिबार सम्पन्न भएको छ ।

कार्यक्रमका प्रमुख अतिथि भक्तपुर नगरपालिकाका उपप्रमुख रजनी जोशीले भक्तपुर नगरमा सञ्चालित सहकारीहरु समुदायमा आधारित र सदस्य केन्द्रीत रही सही मोडेलमा सफल रुपमा सञ्चालने भइरहेको बताउनुभयो । सहकारी सुशासनका लागि जारी ३५ बुँदे निर्देशन, COPOMIS र goAML ले सहकारी संस्थालाई अझ सुशासित हुन, सहकारीको तथ्यांकलाई सुव्यवस्थित गर्न र सहकारीको सम्पत्ती शुद्धिकरण निवारणका व्यवस्थाहरु अनलाइन मार्फत प्रविेदनहरु पेश तथा अद्यावधी गर्न मद्दत गर्ने भएकोले सम्पूर्ण सहकारी संस्थाले कार्यान्वनमा लानुपर्ने विचार व्यक्त गर्नु भयो । उहाँले जसरी भक्तपुर नगरपालिकाले ख्वप मोडेलको उदाहरण बन्न सक्यो त्यसरी नै सहकारी क्षेत्रमा पनि भक्तपुर नगरपालिका सहकारीहरु नमुना बन्नको लागि समेत शुभकामना व्यक्त गर्नुभयो ।

संघका अध्यक्ष कृष्ण गोविन्द लाखाजुले सहकारी विभागबाट जारी ३५ बुँदे निर्देशन सकारात्मक रहेको बताउनुभयो । निर्देशनमा हाल प्रक्रिया नपुर्याई दर्ता भएका बहुउद्देश्यीय सहकारीबारे मौन देखिएको र सहकारी सबैले वेवसाइट राख्ने र अद्यावधि गर्न नसकिने हुँदा सहकारीको कारोबारको आधारमा बर्गिकरण गरी अनिवार्य गर्नुपर्ने विचार व्यक्त गर्नुभयो ।

संघका व्यवस्थापक बालकृष्ण धोजुले कोपोमिसको परिचय, कोपोमिस प्रयोग गर्दाको फाइदा र हाल कोपोमिसमा भएको अद्यावधिक बारेमा प्रस्तुत गर्नुभयो । साथै goAML मा दर्ता र प्रतिवेदनहरु कसरी अनलाइनबाट बुझाउने भन्नेबारेमा समेत प्रस्तुतीकरण गर्नुभयो । राज्यले सहकारी प्रबद्र्धन र विकासको लागि नै नयाँ प्रविधिहरुको विकास गरिने भएकोले सकारात्मक सोचका साथ कोपमिस र goAML सफ्वेयरमा आबद्ध भई कार्यान्वयन गर्नुपर्नेमा जोड दिनुभयो ।

कार्यक्रमका सभापति संघका सचिव जगनाथ प्रजापतिले कार्यक्रममा विभागद्वारा जारी ३५ बुँदे निदेशन, कोपोमिस र gOAML मा आबद्ध हुनु अनुरोध गनुभयो । हाल सहकारीमा सुशासनकै अभावमा सञ्चालकले घर जग्गामा लगानी, सञ्चालकको स्वार्थ र कर्मचारीको बदमासीले समस्याहरु देखिएको बताउनुभयो । ती समस्याले गर्दा सही ढंगले सञ्चालन गरेका सहकारीलाई पनि लज्जित र अभियानमै अविश्वासको वातावरण सिर्जना गराएको त्यसतर्र्फ सचेत रहन समेत अनुरोध गर्नुभयो । 

कार्यक्रममा स्वागत मन्तव्य उपसमितिका सदस्य अनिल कुमार सुवालले गर्नुभयो । अन्तरक्रिया कार्यक्रममा भक्तपुर नगरका सहकारी संस्थाका अध्यक्ष र व्यवस्थापक गरी १२४ जनाको सहभागिता रहेको थियो । कार्यक्रमको सञ्चालन उपसमितिका सदस्य राजन जतिले गर्नुभयो ।