श्यामराजा तिमल्सिना
सिन्धुली । जिल्लामा सञ्चालित चार बचत तथा ऋण सहकारी संस्थाहरु नेफ्स्कूनले सञ्चालन गरेको जोखिममा आधारित साकोस सुपरिवेक्षण कार्यक्रमा (कर्ब्स) मा आबद्ध भएका छन् । बुधबार सिन्धुली जिल्ला बचत तथा ऋण सहकारी संघमा आयोजित सहकारी अभिमुखीकरण कार्यक्रमका अवसरमा साकोस, जिल्ला बचत संघ सिन्धुली र नेफ्स्कून बीच त्रिपक्षिय सम्झौता मार्फत साकोसहरु कर्ब्स कार्यक्रममा जोडिएका हुन् । 

कर्ब्स कार्यक्रममा आबद्ध हुनेहरुमा जिल्लामा सञ्चालित साहारा साकोस, सुर्यमुखी महिला साकोस, स्वावलम्बन साकोस र कपीलेश्वर महिला साकोस रहेका छन् । पछिल्लो समय सिन्धुलीमा सञ्चालित बचत तथा ऋण सहकारी संस्थाहरुको गुणस्तर सुधारका कार्यक्रमहरुमा सहभागी बन्ने क्रम बढेको छ ।  यस सँगै सिन्धुली जिल्ला बाट कर्ब्स कार्यक्रममा आवद्ध हुने साकोसहरुको संख्या मात्रै २३ पुगेको छ ।

कार्यक्रममा साकोसको तर्फबाट अध्यक्ष  तथा व्यवस्थापक, जिल्ला संघको तर्फबाट अध्यक्ष बालकुमारी श्रेष्ठ, कोषाध्यक्ष कृष्णहरी कोइराला र कार्यक्रम अधिकृत शारदा प्रसाद पहाडी तथा नेफ्स्कूनको तर्फ बाट अनुगमन अधिकृत श्यामराजा तिमल्सिना र सिन्धुली सेवा केन्द्र प्रमुख श्याम बुढाथोकीले संयुक्त रुपमा हस्ताक्षर गरी उक्त सम्झौता सम्पन्न भएको थियो ।

जिल्ला बचत संघ सिन्धुलीको व्यवस्थापनमा सञ्चालित उक्त कार्यक्रममा जिल्ला बचत संघका अध्यक्ष बालकुमारी श्रेष्ठले कार्यक्रमको आवश्यकता र महत्वको बारेमा प्रकाश पार्दै यस कार्यक्रमले साकोसलाई नीति, विधि र प्रविधिमा लगी सक्षम र गुणस्तर साकोस निर्माणमा सहयोग मिल्ने बताउँदै अन्य साकोसहरु पनि कर्ब्स कार्यक्रममा जोडिन आव्हान गर्नुभएको थियो । साकोसहरुले सम्झौता पश्चात संस्थालाई निति, विधि र प्रविधिमा सञ्चालन गर्नको लागी थप सहयोग मिल्ने अपेक्षा गरेका छन् ।