काठमाडौं । बचत तथा ऋण सहकारीहरु सम्बन्धी स्थिरीकरण कोषमा थप ६ साकोसहरुको योगदान थपिएको छ । सिन्धुलीको सुनकोसी गाउँपालिका– बोहरेटारस्थित जनकल्याण बचत तथा ऋण सहकारी संस्था लि. र सोही गाउँपालिका रामटारस्थित सृष्टि महिला बचत तथा ऋण सहकारी संघ लि. ले कोषमा योगदान गरेका हुन् ।

यस्तै, काभ्रेको सामुदायिक बचत तथा ऋण सहकारी संस्था लि.र काठमाडौंको मनिप्लान्ट बचत तथा ऋण सहकारी संस्था लि.ले पनि रकम जम्मा गरेका छन् । यस्तै, काठमाडौं पुरानो सिनामंगलस्थित पाँचतारा बचत तथा ऋण सहकारी संस्था लि. र काठमाडौं नयाँबानेश्वरस्थित ज्योतिपूञ्ज बचत तथा ऋण सहकारी संस्थाले पनि आजै कोषमा योगदान गरेका छन् । ती साकोसहरुले कोषमा योगदान रकमको चेक नेफ्स्कूनलाई हस्तान्तरण गरेका हुन् । 

पछिल्लो समय कोषमा सहकारी संघ संस्थाहरुको योगदानको क्रम बढेको छ । स्थिरीकरण कोषमा हालसम्म २ सय १९ संस्थाबाट १० करोड ७ लाख २१ हजार १८१ रुपैयाँ जम्मा भएको छ । यो सँगै कोष पूर्ण सञ्चालनका लागि आवश्यक न्यूनतम १० करोड रुपैयाँ संकलन भएको छ भने संघले कोष सञ्चालनको तयारी अन्तिम चरणमा पुगेको जनाएको छ ।