काठमाडौं । संविधान एवम् प्रशासनविद् काशिराज दाहालको अध्यक्षतामा पूनर्गठित समस्याग्रस्त सहकारी व्यवस्थापन समितिको पहिलो बैठक आज बसेको छ । बैठकले ११ वटा समस्याग्रस्त सहकारीको सम्पति तथा दायित्व बारे जानकारी लिने काम गरेको सदस्य सचिव केशव पौडेलले साकोस आवाजलाई बताउनुभयो । 

गत चैत २५ गते बसेको मन्त्रिपरिषद् बैठकले दाहाललाई समितिको अध्यक्ष  र पूर्व सहसचिव केशवराज आचार्यलाई सदस्य नियुक्त गरेको थियो । सहकारीविज्ञका रुपमा राष्ट्रिय सहकारी महासंघले सञ्चालक डी.बी. बस्नेतलाई मनोनित गरेको थियो । यसअघि महासंघबाट सञ्चालक टीका बुढाथोकीले समितिमा प्रतिनिधित्व गर्नुभएको थियो । समितिमा दुई सहकारी विज्ञको पद अझै रिक्त छ ।

सहकारी ऐन २०७४ को दफा १०५ मा समस्याग्रस्त घोषित सहकारी संघसंस्थाको व्यवस्थापन तथा दायित्व भुक्तानी सम्बन्धी कार्य गर्न सरकारले व्यवस्थापन समिति गठन गर्न सक्ने व्यवस्था उल्लेख छ । सोही अनुसार २०७४ माघ ८ गते गौरीबहादुर कार्कीको अध्यक्षतामा समिति गठन भएको थियो  । त्यसयता युवराज सुवेदी र कुमारप्रसाद पोखरेलले समितिको नेतृत्व गर्नुभएको थियो ।
 
सरकारले २०७० मा पूर्वन्यायाधीश गौरीबहादुर कार्कीको अध्यक्षतामा समस्याग्रस्त सहकारीको छानबिन गर्न जाँचबुझ आयोग गठन गरेको थियो । जसले १ सय ५३ वटा सहकारी समस्याग्रस्त रहेको प्रतिवेदन सरकारलाई बुझाएको थियो ।