काठमाडौ । ६५ औं राष्ट्रिय सहकारी दिवस तथा १४औं बार्षिकोत्सवका अवसरमा पाँचतारा बचत तथा ऋण सहकारी संस्था लि. ले आज बृहत रक्तदान कार्यक्रम सम्पन्न गरेको छ । रक्तदान कार्यक्रममा १ सय ४६ जनाले रक्तदान गरेका छन् । 

विहान ८ बजेदेखि सुरु भएको रक्तदान कार्यक्रममा रक्तदाताहरुको उल्लेख्य सहभागिता रहेको र दिउसो ३ बजेसम्म १ सय ४६ जनाले रक्तदान गरिसकेको साकोसका अध्यक्ष भोलानाथ पाठकले जानकारी गराउनुभयो । रक्तदान जस्तो महान् कार्य मानव जिवन रक्षाका निम्ति पवित्र र पुण्यको काम हो, पाँचतारा साकोसले रक्तदान कार्यक्रमलाई विगत १२ बर्षदेखि नै विशेष महत्व दिएर निरन्तर आयोजना गर्ने गरेको उहाँले बताउनुभयो,  “रक्तदान कार्यक्रम अत्यन्त संम्बेदनशील पक्ष हो, यसमा देखासिकी मात्र नभएर सुरक्षित र सम्यमितता पनि उत्तिकै अपनाउनु जरुरी छ ।” 

पुरानो सिनामंगल ३२ स्थित पाँचतारा साकोसकोे प्राङ्गणमा आयोजित कार्यक्रम ब्लड डोनर्स एशोसियसन नेपाल (ब्लोदान) पूर्विभेगिए क्षेत्रिय कमिटि कोटेश्वर र काठमाडौं बचत तथा ऋण सहकारी संघ लि.(कास्कून) को संयोजनमा भएको थियो । 

कार्यक्रममा ब्लोदानका केन्द्रीय उपाध्यक्ष उज्ज्वल केसी, कास्कुनका सचिव शालिकराम पुडासैनी, ब्लोदान काठमाण्डौका अध्यक्ष जनक खड्का लगायत विभिन्न संघसंस्थाका प्रतिनिधिहरुको उपस्थिति रहेको थियो । अनौपचारिक रुपमा आयोजना गरिएको कार्यक्रममा रक्तदाताहरुको उत्साहजनक सहभागिता थियो । 

साकोसले रक्तदाताहरुलाई टिसर्ट, क्याप जस्ता उपहार प्रदान गरी हौसला समेत बढाएको थियो । रक्तदान कार्यमा नेपाल बचत तथा ऋण केन्द्रीय सहकारी संघ लि.(नेफ्स्कून) केन्द्रीय कार्यालयका कर्मचारीहरु पनि सहभागी हुनुभएको थियो ।