काठमाडौं । विरेन्द्रनगर साकोस पथरी शनिश्चरेको अयोजना र नेफ्स्कूनको प्राविधिक सहजीकरणमा साकोसको संस्थागत विकास तालिम झापाको बुधबारेमा शनिवार सम्पन्न भएको छ । 

साकोसका अध्यक्ष देवी प्रसाद दंगालको अध्यक्षतामा सुरु तालिमको समापन समारोह प्रमुख व्यक्ति नेफ्स्कूनका सञ्चालक घनश्याम अधिकारीको अध्यक्षतामा सम्पन्न भएको थियो । तीन दिवसीय तालिममा साकोसका सञ्चालक समिति, लेखा सुपरिवेक्षण समिति, सल्लाहकार, उपसमिति, पूर्वसञ्चालक र व्यवस्थापनको गरी २८ जनाको सहभागिता रहेको थियो । 

प्रमुख अतिथि घनश्याम अधिकारीले समुदायमा आधारित भएर सदस्यहरुलाई गुणस्तरिय सेवा प्रवाहमा सफल विरेन्द्रनगर साकोस बचत ऋण अभियानमा गर्व गर्न लायक रहेकोप्रति खुसी व्यक्त गर्नुभएको थियो । साकोसले  सहकारीको राष्ट्रिय तथा अन्तर्राष्ट्रिय मुल्य मान्यता सिद्दान्त अनुसार सञ्चालन गर्न सफल भएको र यसलाई अझ परिस्कृत गर्दे निरन्तरता दिनुपर्नेमा उहाँले सुझाव समेत दिनुभएको थियो । 

आज भन्दा झण्डै दुई सय वर्ष पहिले एफ.डब्लु.राईफाईसनको विचार स्व-सहयोग, स्व-उत्तरदायित्व र स्व-शासनको विषय आज पनि सञ्चालकहरुले सदस्यहरुको विचमा लानुपर्ने उहाँले बताउनुभयो । साकोस सञ्चालनमा देशको संरचना अनुसार कानुनी दुविदाहरु रहेको र त्यसलाई समाधान गर्नको निम्ती अभियान निरन्तर राज्यसँग बहस पैरवी गरिरहेको छ, उहाँले भन्नुभयो, “नेफ्स्कूनले साकोस अभियानलाई सुद्धढिकरण गर्दै बलियो बनाउन र आम सदस्यहरुको वचतको सुरक्षा गर्नको लागि स्तरिकरण र स्थिरीकरण कार्यक्रमलाई दुई पाङग्राको रुपमा सँगसँगै अगाडि बढाएको छ ।” समयअनुरुप युग प्रविधिमा रुपान्तरित भइरहेको हुँदा अब साकोसहरु पनि प्रविधिमैत्री हुनुपर्ने र नेफ्स्कूनले यस विषयलाई निकै महत्व दिदै अबको केही समयमा साकोसहरुलाई पूर्णरुपमा प्रविधिमैत्री गराउनको लागि कार्य गरिरहेको र  त्यसका लागि साकोसहरु तयार हुनुपर्नेमा समेत उहाँले प्रष्ट पार्नुभयो । 

तालिमको सहजीकरण नेफ्स्कूनका कार्यक्रम अधिकृत द्वय कोमलराज अधिकारी र रामकृष्ण भट्टराईले गर्नुभएको थियो ।
 
तालिमका सहभागीहरुले तालिम समापनका अवसरमा प्रतिक्रिया दिँदै संस्थागत विकास तालिम आफैमा उत्कृष्ट रहेको र प्राप्त सिकाइ उपलब्धिहरुलाई पूर्ण कार्यान्वयनमा लान प्रतिबद्धताका साथ लाग्ने हो भने अवश्य सफल भइने विश्वास व्यक्त गर्नुभएको थियो ।