एजेन्सी । अन्तर्राष्ट्रिय सहकारी महासंघका अध्यक्ष एरियल ग्वार्कोले कोभिडले सामाजिक, आर्थिकसँगै मानवीय स्वास्थ्यमा गम्भीर संकट परेको भन्दै यसबाट त्राण पाउन सहकार्यको विकल्प नभएको बताउनुभएको छ । ९९ औं अन्तर्राष्ट्रिय सहकारी दिवस (कोअप्स् डे) तथा २७ औ संयुक्त राष्ट्र संघीय सहकारी दिवसको उपलक्ष्यमा भिडियो शुभकामनामार्फत आइसीए अध्यक्ष ग्वार्कोले ‘सहकारीको बिशिष्ट मुल्य, मान्यता र सिद्धान्तमा आधारित सहकारी  पहिचानले जनताका इच्छा चाहनाहरुको सम्बोधनको माग जुनसुकै समयमा गर्दछन’ भन्नुभएको छ ।

संकटको समयमा सहकारीको यो फरक पहिचानको जगमा नै समुदायहरुको पुननिर्माण सम्भव हुने अध्यक्ष ग्वार्कोले दाबी गर्नुभएको छ ।  संकटको बहानमा समाजमा विभेद र असमानता बढ्न सक्ने भन्दै उहाँले सहकारीहरु थप सजग बन्नुपर्ने बताउनुभएको छ । अध्यक्ष ग्वार्कोले यस वर्ष सहकारीहरुको प्राथमिकता अब पुनर्निमाण गरिने समाजहरु यस प्रकारका सम्भावित विपत्तिहरु सामना गर्न सक्षम हुने गरी काम गर्नुभएकोतर्फ हुनुपर्नेमा जोड दिनुभएको छ ।

मलेसियाको राजधानी क्वालालम्पुरमा सम्पन्न आइसीएको सन् २०१७ मा भएको साधारण सभाले अर्जेन्टिनी सहकारीकर्मी ग्वार्कोलाई अध्यक्ष चुनेको थियो । सन् १८९५ मा लन्डनमा गठन भएको आइसीएको मुख्यालय हाल बेल्जियमको राजधानी ब्रसेल्समा छ ।