मकवानपुर । सहकारी विभाग र नेपाल बचत तथा ऋण केन्द्रीय सहकारी संघको संयुक्त आयोजनामा सहकारी क्षेत्र सुदृढीकरण तथा प्रणाली सुधार कार्यक्रम अन्र्तगत २ दिवसीय बचत तथा ऋण सहकारी संस्थाहरुको सदस्य केन्द्रीयता सूचकाङ्क तथा स्थलगत सिद्धान्त परिक्षण अभिमुखिकरण कार्यक्रम मकवानपुर, कुलेखानीमा  २०७७ चैत्र २० गतेबाट शुरु भएको छ । सहकारीका मूल्य मान्यता र सिद्धान्तलाई व्यवहारिक रुपमा मापन गर्नका लागि सूचकहरुको निर्माण, विश्व ऋण परिषदद्धारा जारी बचत तथा ऋण सहकारीका लागि सुशासनका सिद्धान्तका कार्यान्वयन मानकहरुको निर्माण, सदस्य केन्द्रीयता सूचकांक र यसका मापनका सूचकहरुको परिक्षण विधि, सिकाईका लागि दीगो स्थानीय पर्यावरण सम्बन्धि मार्गदर्शन निर्माण, सदस्य सेवाका लागि उत्कृष्ठ कार्यवातावरण र परीक्षणका सूचकहरुको निर्माणका लागि कार्यशाला गोष्ठीको आयोजना गरिएको हो । यस कार्यशालामा सदस्य सेवा विभाग अन्र्तगत अधिकृत स्तरका २१ जना कर्मचारीहरुको उपस्थिती रहेको छ । 

कार्यक्रम शुरुवात गर्दै संघका उपाध्यक्ष शान्ती अधिकारीले सहकारीहरु सुशासनमा सञ्चालन नहुँदा थोरै सहकारी बिग्रँदा समग्र सहकारी अभियानको विश्वसनियता माथि प्रश्नचिन्ह उठने गरेको बताउँदै सुशासन र सदस्य केन्द्रीयताले नै सहकारी संस्थाको दीगोपना कायम हुने बताउनुभयो । संघका महासचिव दामोदर अधिकारीले संस्थाहरुको वासलात बृद्धिमात्रैलाई सफलताको सूचकमा नलिई सदस्यकोे जीवनस्तर परिवर्तनमा संस्थाले गरेका कार्यहरु, सदस्य सहभागिता, विस्तारित मञ्च, निरन्तर सदस्य शिक्षा र सुशासनका अभ्यासहरुको पालना मापनलाइ सफलताको सूचकमा समावेश गर्नु आवश्यक भएको बताउनुभयो । अभिमुखिकरणमा सहकारी विभागका उपरजिष्ट्रार सुरेन्द्र पौडेल, संघको प्रशासन तथा समन्वय विभाग प्रमुख सञ्जयराज तिमिल्सेना, सदस्य सेवा विभाग प्रमुख दुर्गा प्रसाद ढकालले सहजीकरण गर्नुहुनेछ ।