काठमाडौं । प्राकृतिक विपत्तिले रसुवा, धादिङ र नुवाकोटका सहकारी संस्थामा पु¥याएको क्षतिप्रति गम्भीर चासो व्यक्त गर्दै नेपाल बचत तथा ऋण केन्द्रीय सहकारी सङ्घ लि. (नेफ्स्कून) ले प्रभावित सहकारी संस्थालाई पुनः पहिलाकै अवस्थामा फर्काउन आफ्ना सम्पूर्ण उपलब्ध स्रोत–साधन, जनशक्ति र संस्थागत क्षमताको अधिकतम उपयोग गर्ने प्रतिबद्धता व्यक्त गरेको छ ।

नेफ्स्कूनका अध्यक्ष चन्द्रप्रसाद ढकालले बाढी तथा प्राकृतिक विपत्तिबाट प्रभावित रसुवा, धादिङ र नुवाकोटमा सहकारी संस्थाका सञ्चालक तथा कर्मचारीहरूसँग छलफल तथा अन्तरक्रिया गर्दै विपत्तिको यस कठिन घडीमा प्रभावित सहकारीहरूलाई ढुक्क भएर पुनःस्थापना र पुनर्निर्माणको अभियानमा जुट्न आग्रह गर्नुभएको छ ।

प्रभावित सहकारीहरूलाई पहिलेकै अवस्थामा फर्काउन नेफ्स्कूनका कर्मचारी, प्राविधिक जनशक्ति तथा उपलब्ध स्रोत–साधन परिचालन गरिने बताउनुभएको छ । प्रविधिको व्यवस्थापन तथा सेवा सुचारु गर्न आवश्यकता हेरी मिरा सफ्टवेयर निःशुल्क उपलब्ध गराउनुका साथै सुरुवाती चरणमा केही ल्यापटप, प्रिन्टर तथा आवश्यक उपकरण उपलब्ध गराउने तयारी गरिएको छ ।

त्यसैगरी, प्रभावित सहकारीहरूको सेवा पुनःसञ्चालन, प्राविधिक समस्या समाधान तथा आवश्यकताअनुसार मनोसामाजिक सहयोगका लागि सहजकर्ता परिचालन गरिनेछ । यस कार्यमा नेफ्स्कूनको प्राविधिक तथा व्यावसायिक टोलीलाई परिचालन गर्दै सम्बन्धित जिल्ला बचत तथा ऋण सहकारी संघसँगको समन्वयमा आवश्यक सहयोग उपलब्ध गराइने समेत उल्लेख गर्नुभएको छ  ।

प्राकृतिक विपत्तिका कारण सहकारी संस्थाहरूले भोगेको वास्तविक क्षति, सदस्यहरूको अवस्था तथा संस्थागत चुनौतीको सही तथ्याङ्क संकलन गरी यथार्थ विवरण उपलब्ध गराउन प्रभावित सहकारीहरूलाई अनुरोध गरिएको छ । सही तथ्य र वास्तविक आवश्यकताका आधारमा मात्र सहयोगलाई प्रभावकारी, व्यवस्थित र परिणाममुखी बनाउन सकिने भएकाले क्षतिको वास्तविक विवरण तयार पार्न विशेष जोड दिइएको छ ।

विपत्तिले केवल सहकारीको भौतिक संरचनामा मात्र क्षति पु¥याएको छैन, यसले सदस्यको विश्वास, संस्थाको आर्थिक अवस्था, कर्मचारीको मनोबल र समुदायको आशासमेत प्रभावित बनाएको छ । यही संवेदनशील अवस्थालाई आत्मसात् गर्दै नेफ्स्कूनले अभिभावकीय भूमिकामा प्रभावित सहकारीको साथमा उभिएर पुनःस्थापनाको यात्रामा आवश्यक सहयोग गर्ने प्रतिबद्धता व्यक्त गरेको हो ।

प्रभावित क्षेत्रमा रहेका सहकारीकर्मीहरूलाई “नआत्तिनुस्, निराश नहुनुस् र ढुक्क भएर पुनःस्थापनाको काममा जुट्ने” सन्देश दिँदै नेफ्स्कूनले आफ्ना कर्मचारी, प्राविधिक जनशक्ति तथा उपलब्ध सबै संस्थागत स्रोत–साधनलाई प्रभावित सहकारीको पुनःउत्थानका लागि परिचालन गर्न कुनै कसर बाँकी नराख्ने जनाएको छ ।

सहकारी संस्थाहरूलाई पुनः आफ्नो खुट्टामा उभ्याउने, सदस्यको विश्वास जोगाउने र संकटमा परेको सहकारीलाई पहिलाकै अवस्थामा फर्काउने अभियानमा नेफ्स्कूनको सम्पूर्ण संस्थागत शक्ति परिचालन हुने प्रतिबद्धता व्यक्त गरिएको छ। विपत्तिबाट प्रभावित प्रत्येक सहकारीलाई फेरि सक्षम, सक्रिय र सदस्यमुखी संस्थाका रूपमा स्थापित गर्न आवश्यक सबैखाले पहल गरिने जनाइएको छ।