बर्दिया । किसान कमैया कल्याण बचत तथा ऋण सहकारी संस्था लिमिटेडको आयोजना तथा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को प्राविधिक सहयोग र The German Sparkassenstiftung for International Cooperation (DSIK)  जर्मनीको सहयोगमा  सञ्चालित तीनदिने कृषक व्यावसायिक खेल तालिम सम्पन्न भएको छ ।

साउन २६ गतेदेखि २८ गतेसम्म सञ्चालन भएको तालिमको उद्घाटन कार्यक्रममा नेफ्स्कूनका वरिष्ठ उपाध्यक्ष दामोदर अधिकारीको प्रमुख आतिथ्यता रहेको थियो । कार्यक्रममा जिल्ला सहकारी संघ, बर्दियाका अध्यक्ष लगायत विभिन्न अतिथिहरूको उपस्थिति रहेको थियो । कार्यक्रमको अध्यक्षता किसान कमैया कल्याण बचत तथा ऋण सहकारी संस्था लिमिटेडकी अध्यक्ष सरस्वती शर्माले गर्नुभएको थियो ।

तालिमको सहजीकरण नेफ्स्कूनका कार्यक्रम अधिकृत प्रविण अधिकारी र महेश बरालले गर्नुभएको थियो । तालिममा संस्थाका सदस्य तथा कृषक सदस्य गरी जम्मा २५ जनाको सहभागिता रहेको थियो ।

तालिममा सहभागी कृषकहरूलाई परम्परागत रूपमा कक्षा सञ्चालन गरेर मात्र नभई खेल तथा विभिन्न व्यावहारिक गतिविधिमार्फत वित्तीय ज्ञान र सीप प्रदान गरिएको थियो। खेलका माध्यमबाट बचत, ऋण, वित्तीय व्यवस्थापन, आय–व्यय व्यवस्थापन तथा कृषि व्यवसायलाई व्यावसायिक रूपमा अगाडि बढाउने विषयमा जानकारी गराइएको थियो ।

खेलमार्फत सिकाइको अभ्यास भएकाले तालिम थप रोचक, प्रभावकारी तथा सहभागीमैत्री बनेको थियो । सहभागीहरूले खेल्दै र अभ्यास गर्दै वित्तीय ज्ञान हासिल गर्न पाएको भन्दै तालिम अत्यन्तै उपयोगी र ज्ञानवर्धक रहेको प्रतिक्रिया दिएका थिए ।

तालिमको समापन साउन २८ गते भएको हो । समापन कार्यक्रममा ठाकुरबाबा नगरपालिकाकी उपप्रमुख  बिना कुमारी भट्टाई प्रमुख अतिथिका रूपमा उपस्थित हुनुहुन्थ्यो । कार्यक्रममा तालिमका सहभागी, संस्थाका पदाधिकारी तथा कर्मचारीहरूको सहभागिता रहेको थियो । समापन कार्यक्रममा बोल्दै अतिथिहरूले कृषकहरूको क्षमता विकाससँगै वित्तीय ज्ञान अभिवृद्धि गर्न यस्ता कार्यक्रम महत्वपूर्ण रहेको बताउनुभयो । कृषि पेशालाई व्यावसायिक र आत्मनिर्भर बनाउँदै कृषकहरूको आर्थिक अवस्था सुधार गर्न वित्तीय ज्ञानको महत्वपूर्ण भूमिका रहनेमा समेत जोड दिइएको थियो ।

तीन दिनसम्म सञ्चालन भएको उक्त कृषक व्यावसायिक खेल तालिम उपलब्धिमूलक र प्रभावकारी रूपमा सम्पन्न भएको संस्थाले जनाएको छ । तालिमले सहभागी कृषकहरूमा कृषि व्यवसायसम्बन्धी ज्ञानसँगै वित्तीय व्यवस्थापन गर्ने क्षमता र आत्मविश्वास अभिवृद्धि गर्न महत्वपूर्ण योगदान पु¥याएको छ ।