महोत्तरी । महालक्ष्मी स्वावलम्बन बचत तथा ऋण सहकारी संस्था लिमिटेड, सम्सी गाउँपालिका–५, महोत्तरी नेपाल बचत तथा ऋण केन्द्रीय सहकारी संघ लि. (नेफ्स्कून) द्वारा सञ्चालित नियमित निरीक्षण तथा अनुगमन (स्क्यान) कार्यक्रममा साउन १४ गते औपचारिक रूपमा आबद्ध भएको छ ।

नेफ्स्कूनले यसअघि एक्सेस, प्रोबेशन तथा जोखिममा आधारित साकोस विकास कार्यक्रम (कब्र्स) सञ्चालन गर्दै आएकोमा संघको ३८औँ स्थापना दिवसको अवसरमा स्क्यान कार्यक्रमको शुभारम्भ गरेको हो । सहकारी ऐन, २०७४ को दफा २५ तथा दफा ९९ ले प्रदान गरेको कानुनी आधारमा सम्पन्न सम्झौताअनुसार सहकारी संस्थाहरूले जोखिम व्यवस्थापन, वित्तीय विश्लेषण, गुणस्तरीय सेवा प्रवाह तथा संस्थागत सुदृढीकरणलाई प्राथमिकताका साथ अघि बढाउनेछन् ।

सहकारी संस्थालाई थप व्यवस्थित, उत्तरदायी र सुदृढ बनाउने उद्देश्यले नियामक निकायहरूले जारी गरेका निर्देशिकाअनुसार साकोसहरूले पालना गर्नुपर्ने नीति तथा मापदण्डहरूको अवस्थाको विश्लेषण गर्न नेफ्स्कूनले नियमित सुपरिवेक्षण, वित्तीय सूचकाङ्क मूल्याङ्कन तथा आन्तरिक नियन्त्रण प्रणालीको परीक्षण स्क्यानका सूचकहरूको आधारमा निरन्तर अनुगमन गर्नेछ ।

स्क्यान कार्यक्रम मार्फत साकोसहरूमा वित्तीय सुशासन प्रवद्र्धन, सम्पत्ति शुद्धीकरण तथा आतंकवादी क्रियाकलापमा वित्तीय लगानी निवारणसम्बन्धी प्रतिवेदन तोकिएबमोजिम सम्बन्धित निकायमा पेश गर्ने प्रणालीको प्रभावकारी कार्यान्वयन, भाखा नाघेको ऋण असुलीमा सुधार, जोखिम व्यवस्थापन तथा संस्थागत क्षमता विकास गर्ने लक्ष्य राखिएको छ । साथै गुणस्तर सुनिश्चितता कार्यक्रम मार्फत ब्रान्ड प्राप्ति, योजनाबद्ध साकोस सञ्चालन, सहकारीमैत्री व्यवस्थापन, क्युरिमा–३६० अनुसार क्षेत्रगत जोखिम न्यूनीकरण तथा सदस्यहरूको बचतलाई सुरक्षित र संस्थालाई दिगो एवं स्वस्थ बनाउने उद्देश्यका साथ कार्यक्रम लागू गरिएको हो ।

स्क्यान कार्यक्रममा आबद्धतासम्बन्धी सम्झौतापत्रमा नेफ्स्कूनका सदस्य सेवा विभाग प्रमुख दुर्गा प्रसाद ढकाल र संस्थाका अध्यक्ष गगनदेब यादवले हस्ताक्षर गर्नुभएको छ । सम्झौता कार्यक्रममा संस्थाका व्यवस्थापक रामविश्वास यादव तथा नेफ्स्कूनका कार्यक्रम अधिकृत महेश बराल र सहजकर्ता श्याम बुढाथोकीको रोहवरमा स्क्यान कार्यक्रमको औपचारिक सम्झौता सम्पन्न भएको थियो ।