काठमाडौं । राष्ट्रिय सहकारी नियमन प्राधिकरण (NCRA) ले बचत तथा ऋणको मुख्य कारोबार गर्ने सहकारी संस्थाका लागि नयाँ निर्देशन जारी गरेको छ । 

निर्देशन अनुसार आर्थिक वर्ष २०८२/०८३ भित्र पाकेको ब्याज २०८३ साल श्रावण १५ गतेभित्र असुल भएमा त्यसलाई आर्थिक वर्ष २०८२/०८३ कै आम्दानीका रूपमा लेखांकन गर्न सकिने व्यवस्था गरिएको छ ।

प्राधिकरणले सहकारी ऐन, २०७४ को दफा १०३ज. बमोजिमको अधिकार प्रयोग गर्दै उक्त निर्णय लागू गरेको जनाएको छ । यो व्यवस्था विशेषगरी बचत तथा ऋणको मुख्य कारोबार गर्ने सहकारी संस्थाहरूमा लागू हुनेछ ।

यस निर्देशनले आर्थिक वर्षको अन्त्यसम्म उठ्न बाँकी रहेको ब्याज श्रावण १५ भित्र असुल भएमा त्यसलाई अघिल्लो आर्थिक वर्षको आयमा समावेश गर्न सकिने स्पष्ट पारेको छ । यसबाट सहकारीहरूको वित्तीय विवरण तयार गर्न र लेखांकनमा सहजता हुने अपेक्षा गरिएको छ  ।