दोलखा । जिरी नगरपालिका–६ स्थित श्री आकाशद्विप बचत तथा ऋण सहकारी संस्था लिमिटेडमा नेपाल बचत तथा ऋण केन्द्रीय सहकारी संघ लिमिटेड (नेफ्स्कून)द्वारा सञ्चालित नियमित निरीक्षण तथा अनुगमन (स्क्यान) कार्यक्रम अन्तर्गत असार ११ गते स्थलगत सुपरिवेक्षण सम्पन्न भएको छ ।

सहकारी क्षेत्रको पारदर्शिता, उत्तरदायित्व तथा सदस्यहित सुनिश्चित गर्ने उद्देश्यले नेफ्स्कूनले सहकारी संस्थाहरूमा नियमित रूपमा स्थलगत सुपरिवेक्षण सञ्चालन गर्दै आएको छ । सुपरिवेक्षणका क्रममा संस्थाको बचत, ऋण, लेखापरीक्षण, लगानी तथा आर्थिक कारोबारको वास्तविक अवस्था, सदस्यहरूले प्राप्त गर्ने सेवा–सुविधा, भाखा नाघेका ऋणको कानुनी प्रक्रियामा लैजाने विषय, संस्थाभित्र हुन सक्ने सम्भावित त्रुटि, आर्थिक जोखिम तथा व्यवस्थापकीय सुधारका पक्षहरूको विस्तृत मूल्यांकन गरिएको थियो ।

त्यसैगरी, संस्थाको निर्णय प्रक्रिया, नेतृत्वको पारदर्शिता, उत्तरदायित्व, सदस्य सहभागिता तथा प्रविधिमा आधारित सदस्य सूचना प्रणालीको प्रभावकारी प्रयोगमार्फत जोखिम विश्लेषण गरी जोखिम न्यूनीकरणका उपायहरूको खोजी गर्नु पनि सुपरिवेक्षणको प्रमुख उद्देश्य रहेको छ ।

नेफ्स्कूनका कार्यक्रम अधिकृत राजन सुबेदीको नेतृत्वमा सम्पन्न सुपरिवेक्षणमा संस्थाका अध्यक्ष, व्यवस्थापक तथा कर्मचारीहरूको सहभागिता रहेको थियो । सुपरिवेक्षणका क्रममा संस्थाको विनियम, नीति तथा आन्तरिक कार्यविधि, सम्पत्ति शुद्धीकरण निवारणसम्बन्धी नीति, नियामक निकायबाट जारी निर्देशनहरूको पालना, भाखा नाघेको ऋण असुली, पूँजी पर्याप्तता अनुपातको विश्लेषण, समग्र वित्तीय अवस्था तथा संस्थाले प्रदान गर्दै आएको सेवा–सुविधाका विषयमा विस्तृत छलफल भएको थियो । 

सुपरिवेक्षणपछि संस्थाले सुपरिवेक्षकबाट प्राप्त सुझावहरू आगामी सञ्चालक समितिको बैठकमा विस्तृत रूपमा छलफल गरी क्रमशः कार्यान्वयनमा लैजाने प्रतिबद्धता व्यक्त गरेको छ ।