नवलपरासी । सहकारी संस्थाको वित्तीय स्वास्थ्य, सुशासनको अवस्था र सदस्यप्रतिको उत्तरदायित्वको मूल्याङ्कन गर्ने उद्देश्यले कृष्ण गण्डकी बचत तथा ऋण सहकारी संस्था लिमिटेडमा नेफ्स्कूनद्वारा स्थलगत सुपरिवेक्षण असार ०१ गते सम्पन्न भएको छ ।

बौदीकाली गाउँपालिका–२, नवलपरासी स्थित उक्त संस्थामा नेफ्स्कूनको नियमित निरीक्षण तथा अनुगमन (स्क्यान) कार्यक्रम अन्तर्गत सुपरिवेक्षण गरिएको हो । कार्यक्रमले संस्थाको वर्तमान अवस्था विश्लेषण गर्दै सम्भावित जोखिम पहिचान र सुधारका अवसरहरूको खोजीमा विशेष ध्यान केन्द्रित गरेको थियो ।

सुपरिवेक्षणका क्रममा बचत तथा ऋण परिचालन, लगानीको अवस्था, वित्तीय अनुशासन, लेखापरीक्षण, आन्तरिक नियन्त्रण प्रणाली तथा संस्थाको समग्र आर्थिक गतिविधिको सूक्ष्म अध्ययन भएको थियो । सदस्यहरूले प्राप्त गरिरहेका सेवा–सुविधा, लाभांश वितरण, निर्णय प्रक्रियामा सदस्य सहभागिता तथा संस्थागत पारदर्शिताका पक्षहरू समेत मूल्याङ्कनको दायरामा समेटिएका थिए ।

विशेषगरी प्रविधिमा आधारित सदस्य सूचना प्रणालीको प्रयोग, जोखिम व्यवस्थापनका अभ्यास, नेतृत्वको उत्तरदायित्व तथा व्यवस्थापकीय क्षमताको समीक्षा गर्दै संस्थालाई अझ प्रभावकारी र सदस्यकेन्द्रित बनाउने विषयमा सुझावहरू प्रदान गरिएको नेफ्स्कूनका कार्यक्रम अधिकृत श्यामराजा तिमल्सिनाले बताउनु भएको छ ।

नेफ्स्कूनका कार्यक्रम अधिकृत श्यामराज तिमल्सिनाले सहजीकरण गर्नुभएको सुपरिवेक्षणमा सञ्चालक समिति, व्यवस्थापन तथा कर्मचारीहरूको सहभागिता रहेको थियो । उहाँले सहकारी संस्थाहरूलाई दीर्घकालीन रूपमा सुरक्षित, विश्वसनीय र सदस्यमैत्री बनाउन नियमित अनुगमन, जोखिम विश्लेषण र सुधारात्मक कार्ययोजना अपरिहार्य रहेको बताउनुभयो ।

सहकारी क्षेत्रप्रतिको विश्वास अभिवृद्धि गर्दै संस्थागत सुशासनलाई थप मजबुत बनाउने उद्देश्यसहित सञ्चालन गरिएको सुपरिवेक्षण कार्यक्रमले कृष्ण गण्डकी साकोसको आगामी रणनीतिक सुधार र दिगो विकास यात्रामा महत्वपूर्ण मार्गदर्शन प्रदान गर्ने अपेक्षा गरिएको छ ।