चितवन । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सञ्चालनमा ल्याएको नियमित निरीक्षण तथा अनुगमन (स्क्यान) कार्यक्रमअन्तर्गत प्रोबेसनका सूचकहरूमा केन्द्रित भई चौतारी बचत तथा ऋण सहकारी संस्था लि. मा जेठ ३१ गते स्थलगत सुपरिवेक्षण सम्पन्न भएको छ ।

नेफ्स्कूनले सहकारी संस्थाहरूमा पारदर्शिता, उत्तरदायित्व, सदस्य हितको सुनिश्चितता, जोखिम न्यूनीकरण, सुशासन तथा दिगोपनाको प्रर्बद्धन गर्ने उद्देश्यले आफ्ना सदस्य संघ–संस्थाहरूका लागि स्क्यान कार्यक्रम सञ्चालन गर्दै आएको छ । यस कार्यक्रम मार्फत स्थलगत सुपरिवेक्षण कार्यलाई निरन्तर रूपमा अघि बढाइँदै आएको हो ।

स्थलगत सुपरिवेक्षणका क्रममा संस्थाको स्तरीकरणका लागि आवश्यक विभिन्न सूचकहरू, जस्तैः आन्तरिक कार्यविधिको अद्यावधिक अवस्था, सदस्यमैत्री उत्पादन तथा सेवाहरू, आवधिक योजना, सम्पत्ति शुद्धीकरण निवारण कार्यविधि, नियामक निकायका निर्देशनहरूको पालना, भाखा नाघेका ऋणको असुली, पूँजी पर्याप्तता अनुपात, सूचना प्रविधि व्यवस्थापन, वित्तीय स्रोतको प्राप्ति तथा परिचालन, सेवा कार्यालय सञ्चालन व्यवस्थापनलगायतका विषयमा विस्तृत मूल्याङ्कन गरिएको थियो ।

साथै, साकोसका कानुनी, वित्तीय, ऋण, तरलता, सञ्चालन तथा सुशासनसम्बन्धी जोखिमहरूका साथै प्रविधि जोखिममा केन्द्रित रही संस्थाको समग्र जोखिम न्यूनीकरणका लागि व्यवहारिक सुधारात्मक सुझावहरू प्रदान गरिएको थियो ।

नेफ्स्कूनका कार्यक्रम अधिकृत सन्दीप राज ढकालद्वारा गरिएको स्थलगत सुपरिवेक्षणमा समिति तथा व्यवस्थापनको सहभागितामा सुधारात्मक विषयहरू समेटिएको प्रतिवेदन प्रस्तुत गरिएको थियो । छलफल बैठकमा समिति तथा व्यवस्थापनद्वारा सुधार योजना तय गरी प्राप्त सुझावहरू यथासम्भव कार्यान्वयन गर्ने प्रतिबद्धता व्यक्त गरिएको थियो । संस्थाका अध्यक्ष रामशरण सिलवालको प्रतिबद्धतासहित सुपरिवेक्षण कार्यक्रम सम्पन्न भएको छ ।