काठमाडौं । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सञ्चालनमा ल्याएको नियमित निरिक्षण तथा अनुगमन (स्क्यान) कार्यक्रम अन्तर्गत ज्ञानज्योति महिला उत्थान बचत तथा ऋण सहकारी संस्था लिमिटेडमा स्थलगत सुपरिवेक्षण जेठ २६ गते सम्पन्न गरेको छ ।

नेफ्स्कूनले सहकारी संस्थाहरूमा पारदर्शिता, उत्तरदायित्व, सदस्यहितको सुनिश्चितता, जोखिम न्यूनीकरण, सुशासन तथा दिगोपनाको प्रवद्र्धन गर्ने उद्देश्यले आफ्ना सदस्य संघ–संस्थाहरूका लागि स्क्यान कार्यक्रम सञ्चालन गर्दै आएको छ। सोही कार्यक्रम अन्तर्गत जेठ २६ गते उक्त संस्थामा स्थलगत सुपरिवेक्षण गरिएको हो ।

सुपरिवेक्षणका क्रममा संस्थाको स्तरीकरणका लागि आवश्यक विभिन्न सूचकहरूको मूल्याङ्कन गरिएको थियो । यसअन्तर्गत आन्तरिक कार्यविधिको अद्यावधिक अवस्था, सदस्यमैत्री उत्पादन तथा सेवाहरू, आवधिक योजना, सम्पत्ति शुद्धीकरण निवारणसम्बन्धी कार्यविधि, नियामक निकायका निर्देशनहरूको पालना, भाखा नाघेका ऋणको असुली, पूँजी पर्याप्तता अनुपात, सूचना प्रविधि व्यवस्थापन, वित्तीय स्रोतको प्राप्ति तथा परिचालन, सेवा कार्यालय सञ्चालन व्यवस्थापनलगायतका विषयमा विस्तृत समीक्षा गरिएको थियो ।

संस्थामा रहेका कानुनी, वित्तीय, ऋण, तरलता, सञ्चालन तथा सुशासनसँग सम्बन्धित जोखिमका साथै प्रविधि जोखिमको समेत मूल्याङ्कन गरी समग्र जोखिम न्यूनीकरणका लागि व्यवहारिक सुधारात्मक सुझावहरू प्रदान गरिएको नेफ्स्कूनका अधिकृत सन्दिप राज ढकालले साकोस आवाजलाई बताउनु भयो ।   

नेफ्स्कूनका अनुगमन अधिकृत सन्दिप राज ढकालद्वारा सम्पन्न सुपरिवेक्षणमा संस्थाका सञ्चालक समिति तथा व्यवस्थापनको सहभागिता रहेको थियो । सुपरिवेक्षण पश्चात् सुधारात्मक विषयहरू समेटिएको प्रतिवेदन प्रस्तुत गरिएको थियो भने आयोजित छलफल बैठकमा समिति र व्यवस्थापनले सुधार योजना तय गरेका थिए ।

संस्थाकी उपाध्यक्ष सिता राईले सुपरिवेक्षणबाट प्राप्त सुझावहरूलाई यथासम्भव कार्यान्वयन गर्दै संस्थाको सुशासन, सेवा गुणस्तर तथा संस्थागत सुदृढीकरणमा थप ध्यान दिने प्रतिबद्धता व्यक्त गर्नुभएको छ ।