रामेछाप । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सञ्चालन गर्दै आएको ‘स्क्यान’ कार्यक्रम अन्तर्गत रामेछापको मन्थली नगरपालिका–८, चिसापानी स्थित समावेशी बचत तथा ऋण सहकारी संस्था लिमिटेडमा स्थलगत सुपरिवेक्षण वैशाख १३ गते सम्पन्न गरेको छ ।

सहकारी संस्थाहरूको जोखिम न्यूनीकरण, सुशासन पर्वद्धन तथा दिगोपनामा अभिवृद्धि गर्ने उद्देश्यले सञ्चालन गरिएको उक्त कार्यक्रम अन्तर्गत संस्थाको स्तरीकरण मूल्याङ्कनका लागि सुपरिवेक्षण गरिएको नेफ्स्कूनले जनाएको छ ।

सुपरिवेक्षणका क्रममा संस्थाको आर्थिक तथा वित्तीय अवस्थाको समग्र विश्लेषण गरिएको थियो । साथै संस्थाको व्यवस्थापन प्रणाली, आन्तरिक नियन्त्रण तथा जोखिम व्यवस्थापन सम्बन्धी पक्षहरूमा समेत ध्यान केन्द्रित गरिएको थियो ।

सुपरिवेक्षण पश्चात नेफ्स्कूनका कार्यक्रम अधिकृत सुमनराज घिमिरेले सञ्चालक समिति तथा व्यवस्थापनसँग छलफल गर्दै सुधारका सम्भावित क्षेत्रहरूबारे सुझाव प्रस्तुत गर्नुभएको थियो । छलफलका आधारमा संस्थाले सुधार योजना तयार गरी कार्यान्वयन गर्ने प्रतिबद्धता जनाएको छ । नेफ्स्कूनले यस्ता कार्यक्रम मार्फत सहकारी संस्थाहरूलाई थप व्यवस्थित, पारदर्शी र दिगो बनाउने लक्ष्य लिएको छ ।