नवलपरासी । नवलपरासी सुस्ता पश्चिम स्थित हाम्रो सुपर बचत तथा ऋण सहकारी संस्था लिमिटेड र जनकल्याण बचत तथा ऋण सहकारी संस्था लिमिटेड, नेपाल बचत तथा ऋण केन्द्रीय सहकारी सङ्घ लिमिटेड (नेफ्स्कून) को व्यवसाय विकास सेवा (BDS) कार्यक्रम तथा नियमित निरीक्षण तथा अनुगमन (स्क्यान) कार्यक्रममा आबद्ध भएका छन । 

सहकारी संस्थाहरूको संस्थागत सुदृढीकरण, वित्तीय अनुशासन, जोखिम न्यूनीकरण तथा सदस्यहरूको व्यवसायिक क्षमता अभिवृद्धि गर्ने उद्देश्यले सञ्चालन गरिएको उक्त कार्यक्रममा आबद्धताका लागि  चैत्र ३० गते सम्झौता भएको हो ।

व्यवसाय विकास सेवा कार्यक्रमले “उत्पादनदेखि उपभोक्ता सम्म” वा “सेवादेखि ग्राहक सम्म” को सम्पूर्ण प्रक्रियालाई समेट्दै सदस्यहरूको व्यवसायलाई दिगो र सफल बनाउने लक्ष्य लिएको छ। साथै सदस्यहरूको लगानीलाई उत्पादन, बजार र मूल्य श्रृंखलासँग जोड्ने कार्यमा विशेष जोड दिइनेछ भने नेफ्स्कुनले विगतका एक्सेस, प्रोवेसन तथा कर्ब्स कार्यक्रमबाट प्राप्त सिकाइका आधारमा विकास गरेको स्क्यान कार्यक्रममार्फत आबद्ध सहकारी संस्थाहरूको नियमित निरीक्षण, जोखिम मूल्यांकन तथा गुणस्तर सुनिश्चितता गरिनेछ। यस कार्यक्रमले जोखिम व्यवस्थापन, व्यवस्थापकीय क्षमता विकास, स्वनियमन तथा नियामकीय सक्षमता अभिवृद्धिमा सहयोग पुर्‍याउने अपेक्षा गरिएको छ।

सम्झौता हस्ताक्षर कार्यक्रममा नेफ्स्कूनका तर्फबाट अध्यक्ष चन्द्र प्रसाद ढकाल र कार्यक्रम अधिकृत प्रबिण हाम्रो सुपर साकोसको तर्फबाट अध्यक्ष बिष्णु प्रसाद बराल, कोषाध्यक्ष रुक्मागत पाण्डे तथा व्यवस्थापक बिष्णु बहादुर बस्नेत लगायत उच्च व्यवस्थापनको उपस्थिति रहेको थियो। त्यसैगरी, जनकल्याण साकोसमा आयोजित कार्यक्रममा अध्यक्ष कुलदीप प्रसाद आचार्य, कोषाध्यक्ष वामदेव अधिकारी तथा व्यवस्थापक यमलाल खरेल लगायत उच्च व्यवस्थापनको सहभागिता रहेको थियो।

कार्यक्रममार्फत सहभागी साकोसहरूलाई संस्थागत सुधार, वित्तीय पारदर्शिता, सेवा विस्तार तथा व्यवसाय विकास सम्बन्धी व्यवहारिक ज्ञान तथा अनुभव आदानप्रदान गर्ने अवसर प्राप्त हुने विश्वास गरिएको छ। साथै, यसले सहकारी संस्थाहरूलाई दिगो र प्रतिस्पर्धी बनाउन महत्वपूर्ण योगदान पुर्‍याउने अपेक्षा गरिएको छ।