मोरङ । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी क्षेत्रमा सुशासन, दिगोपन तथा वित्तीय अनुशासन प्रवर्द्धन गर्ने उद्देश्यका साथ नियमित स्थलगत सुपरिवेक्षण कार्यक्रमलाई निरन्तरता दिएको छ।

यसै क्रममा नेफ्स्कूनले पौष २० गते सातमेडी बचत तथा ऋण सहकारी संस्था लिमिटेड, रतुवामाई नगरपालिका–मोरङको स्थलगत निरीक्षण तथा अनुगमन सम्पन्न गरेको हो ।

सुपरिवेक्षणको उद्देश्य सहकारी संस्थाहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड तथा कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रवर्द्धन गर्नु तथा बचतकर्ताको विश्वास अभिवृद्धि गर्नु रहेको छ।

निरीक्षणका क्रममा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षण व्यवस्था, केवाईसी अद्यावधिक, सम्पत्ति शुद्धिकरण निवारण नीति (AML/CFT) तथा भाखा नाघेका ऋण असुलीका विषयहरू मूल्यांकन गरिएको थियो।

कार्यक्रममा नेफ्स्कूनका तर्फबाट कार्यक्रम अधिकृत महेश वराल सहभागी थिए भने संस्थाको तर्फबाट संचालक समितिका अध्यक्ष, सचिव, सहसचिव, संचालक, व्यवस्थापक तथा उच्च व्यवस्थापन तहका कर्मचारीहरूको उपस्थिति रहेको थियो।