गठ्ठाघर, भक्तपुर । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी संस्थाहरूको जोखिम न्यूनीकरण, सुशासन तथा दिगोपना अभिवृद्धिका लागि सञ्चालन गरेको स्क्यान कार्यक्रम अन्तर्गत श्री अरनिको नमुना बचत तथा ऋण सहकारी संस्था लिमिटेड (गठ्ठाघर, भक्तपुर) को स्थलगत सुपरिवेक्षण कार्य पौष १७ गते सम्पन्न भएको छ ।

पौष १६ र १७ गते सञ्चालित उक्त दुई दिने सुपरिवेक्षण कार्यक्रमले संस्थाको स्तरीकरण र सञ्चालन प्रक्रियालाई थप व्यवस्थित बनाउने लक्ष्य राखेको छ ।सुपरिवेक्षणका क्रममा  नेफ्स्कूनको प्राविधिक टोलीले संस्थाको समग्र आर्थिक स्वास्थ्य र सेवा प्रवाहको गुणस्तर जाँच गरेको थियो । विशेषगरी नेफ्स्कून एमआइएस  , कार्यालय व्यवस्थापन,सम्पत्ति दायित्व व्यवस्थापन, साधारण सभा व्यवस्थापनका विषयमा छलफल भएको थियो । 

सुपरिवेक्षण कार्यको समापनपश्चात् नेफ्स्कूनका कार्यक्रम अधिकृत सुमनराज घिमिरे र नमुना सापकोटाद्धारा भएको स्थलगत सुपरिवेक्षणमा  संस्थाको सञ्चालक समिति र व्यवस्थापन पक्षसँग नतिजाबारे विस्तृत छलफल गर्नुभएको थियो । सो अवसरमा घिमिरेले संस्थालाई थप सुरक्षित र सदस्यमैत्री बनाउन सुधारका उपायहरू सुझाउनुभएको थियो ।

छलफलको आधारमा संस्थाको तर्फबाट एक ठोस सुधार योजनाु तयार गरिएको छ। उक्त योजनालाई अक्षरशः कार्यान्वयन गर्दै संस्थालाई नमुना सहकारीको रूपमा अघि बढाउने प्रतिबद्धता सञ्चालक समिति र व्यवस्थापनले व्यक्त गरेको छ । यस किसिमको नियमित सुपरिवेक्षणले सहकारी क्षेत्रमा देखिने जोखिमलाई न्यूनीकरण गर्दै सदस्यहरूको बचतको सुरक्षा सुनिश्चित गर्न महत्वपूर्ण भूमिका खेल्ने विश्वास लिइएको छ ।