मकवानपुर । मकवानपुरको फाखेलस्थित सक्रिय महिला बचत तथा ऋण सहकारी संस्था लिमिटेड ले सम्भाव्य उद्यमरउद्यमी छनोट तथा प्रशिक्षण कार्यक्रम सम्पन्न गरेको छ ।

साकोसका २५ जना सेयर सदस्यहरूको सहभागितामा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को प्राविधिक सहयोग तथा साकोसको आयोजनामा मंसिर २९ गते एकदिवसीय कार्यक्रम सम्पन्न भएको हो।

साकोसका अध्यक्ष श्रमिक लामाको अध्यक्षतामा सम्पन्न  कार्यक्रममा नेफ्स्कूनका कार्यक्रम अधिकृत रिता सुवेदीले सहजीकरण गर्नुभएको थियो भने कार्यक्रमको सञ्चालन साकोसका व्यवस्थापक सबिना लामाले गर्नुभएको थियो।

कार्यक्रममा सहभागीहरूलाई उद्यम सञ्चालनसँग सम्बन्धित विविध प्राविधिक विषयमा केन्द्रित रहेर प्रशिक्षण प्रदान गरिएको थियो। प्रशिक्षणबाट उद्यम सञ्चालनका लागि आवश्यक ज्ञान तथा सीप अभिवृद्धि हुनुका साथै आफूहरूलाई उद्यमशील बन्न थप हौसला प्राप्त भएको सहभागी सदस्यहरूले बताएका छन्।

व्यवसाय विकास सेवा प्रमुख सोम सिंह तामाङको व्यवस्थापनमा सम्पन्न कार्यक्रममा साकोसका पदाधिकारी तथा सञ्चालक समितिका सदस्यहरूको समेत उपस्थिति रहेको थियो।