फुलासी, रामेछाप । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी संस्थाहरूको जोखिम न्यूनीकरण, सुशासन तथा दिगोपना अभिवृद्धिका लागि अघि बढाएको स्क्यान कार्यक्रम अन्तर्गत रामेछाप जिल्ला मन्थली नगरपालिका १४, फुलासी पोखरी स्थित बुद्ध बचत तथा ऋण सहकारी संस्था लिमिटेडको स्थलगत सुपरिवेक्षण मंसिर २६ गते सम्पन्न गरेको छ ।

स्क्यान कार्यक्रममा आवद्ध रहेको यस संस्थाको स्तरीकरणका लागि नेफ्स्कूनद्वारा स्थलगत सुपरिवेक्षण गरिएको हो । सुपरिवेक्षणले संस्थाको समग्र आर्थिक अवस्था र उपलब्ध सेवा सुविधाको जाँच गर्नुका साथै सदस्यता तथा शेयर व्यवस्थापन, ऋण व्यवस्थापन, सम्पत्ति दायित्व व्यवस्थापन विषयहरूमा केन्द्रित रहेर कार्य गरेको थियो ।

स्थलगत सुपरिवेक्षण सम्पन्न भए पश्चात् मन्थली सदस्य सेवा कार्यालयका ईन्चार्ज सुर्य बहादुर थापा र कार्यक्रम अधिकृत सुमनराज घिमिरेले संस्थाको सञ्चालक समिति र व्यवस्थापन समक्ष सहजीकरण गरी छलफल गर्नुभएको थियो । छलफलबाट संस्थाको सुधार योजना तयार गरी कार्यान्वयन गर्ने प्रतिबद्धता संस्था पक्षबाट व्यक्त भएको छ ।