रामेछाप । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी संस्थाहरूको जोखिम न्यूनीकरण, सुशासन तथा दिगोपनामा अभिवृद्धिका लागि अघि बढाएको स्क्यान कार्यक्रम अन्तर्गत जनहितकोष बचत तथा ऋण सहकारी संस्था लिमिटेडको स्थलगत सुपरिवेक्षण मंसिर ७ गते सम्पन्न गरेको छ ।

सुपरिवेक्षणको उद्देश्य:
प्रोवेशन कार्यक्रममा आवद्ध रहेको यस संस्थाको स्तरीकरणका लागि नेफ्स्कूनद्वारा स्थलगत सुपरिवेक्षण गरिएको हो । सुपरिवेक्षणले संस्थाको समग्र आर्थिक अवस्था र उपलब्ध सेवा सुविधाको जाँच गर्नुका साथै निम्न मुख्य विषयहरूमा केन्द्रित रहेर कार्य गरेको थियो:

• कार्यालय व्यवस्थापन 
• शेयर र बचत व्यवस्थापन 
• नियामकिय व्यवस्था परिपालना 
• ऋण जोखिम व्यवस्थापन 

संस्थाको वर्तमान स्थिति:
रामेछाप जिल्लाको लिखुतामाकोशी गाउँपालिका ६, खिम्तीमा अवस्थित जनहितकोष साकोसको कार्यक्षेत्र लिखु तामाकोशी गाउँपालिकापालिकाको वडा नं ३, ४, ५, ६ र ७ तथा मन्थली नगरपालिकाको वडा नं ११,१२, १३ एवम् गोकुलगंगा गाउँपालिकाको वडा नं ६ रहेको छ । हाल यस संस्थामा  ४४०५ सदस्य र कुल सम्पत्ति ३१ करोड रहेको जनाइएको छ ।

सुधार योजना र कार्यान्वयन प्रतिबद्धता:
स्थलगत सुपरिवेक्षण सम्पन्न भए पश्चात् नेफ्स्कूनका कार्यक्रम अधिकृत सुमनराज घिमिरेले संस्थाको सञ्चालक समिति र व्यवस्थापन समक्ष सहजीकरण गरी छलफल गर्नुभएको थियो । सोही छलफलबाट संस्थाको सुधार योजना तयार गरी कार्यान्वयन गर्ने प्रतिबद्धता संस्था पक्षबाट व्यक्त भएको छ ।