सुनसरी । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) द्वारा प्रगति बचत तथा ऋण सहकारी संस्था लिमिटेड, सुनसरीको स्थलगत सुपरीवेक्षण असोज ३१ गते सम्पन्न भएको छ ।

नेफ्स्कूनले सहकारी संस्थाहरूमा पारदर्शिता, उत्तरदायित्व, सदस्य हितको सुनिश्चितता, जोखिम न्यूनीकरण, सुशासन र दिगोपनाको प्रवद्र्धन गर्ने उद्देश्यले देशभरका सहकारीहरूको स्थलगत सुपरीवेक्षण कार्यलाई निरन्तररूपमा अघि बढाइरहेको छ ।

अनुगमनका क्रममा संस्थाको स्तरीकरणका लागि आवश्यक विभिन्न सूचकहरू — कर्जा, बचत, ब्याजदर, वार्षिक योजना, सम्पत्ति शुद्धिकरण निवारण नीति, नियामक निकायका निर्देशनहरूको पालना, भाखा नाघेका ऋणको असुली, पूँजी प्रयाप्तता अनुपात लगायतका विषयमा विस्तृत मूल्याङ्कन गरेको थियो । एक्सेस कार्यक्रममा आबद्ध रहेको प्रगति साकोसको कानुनी जोखिम, वित्तीय जोखिम, ऋण जोखिम, तरलता जोखिम, संचालन तथा सुशासन सम्बन्धी जोखिमहरूमा केन्द्रित रही संस्थाको समग्र जोखिम न्यूनीकरणका लागि व्यावहारिक सुधारात्मक सुझावहरू प्रदान गरिएको थियो ।

सुपरिवेक्षणमा नेफ्स्कूनका तर्फबाट अधिकृत शौभाग्य भट्टराई सहभागी रहनु भएको थियो । संस्थाको तर्फबाट अध्यक्ष चन्दन कुमार चौधरी, कोषाध्यक्ष दयानन्द चौधरी, सञ्चालक समिति सदस्यहरू, प्रमुख कार्यकारी अधिकृत उमेश कुमार चौधरी साथै व्यवस्थापन प्रतिनिधिहरू श्रवण कुमार चौधरी र सुरेन्द्र चौधरीको उपस्थितिमा छलफल सम्पन्न भएको थियो । संस्थाले २०८२ असोज २५ गते सम्पन्न गरेको साधारण सभाको अवसरमा, नेफ्स्कूनका तर्फबाट अधिकृत शौभाग्य भट्टराईले नवनिर्वाचित अध्यक्ष चन्दन कुमार चौधरीलाई बधाई तथा सफल कार्यकालको शुभकामना व्यक्त गर्नुभएको थियो । स्थलगत अनुगमन पश्चात, सहकारी संस्थाको सुधार गर्नुपर्ने पक्षहरूमा सुझाव प्रदान गर्दै तिनलाई कार्यान्वयन गर्ने सहमति सहित निर्णय गरिएको छ ।