झापा । नेपाल बचत तथा ऋण केन्द्रीय सहकारी संघ लि.(नेफ्स्कून) झापा सदस्य सेवा कार्यालयको आयोजनामा आज सदस्य संस्थाहरुसँग व्यवसाय प्रवर्द्धन सम्बन्धी अन्तरक्रिया गरिएको छ । झापाको चाराली र विर्तामोडमा आयोजित अन्तरक्रिया कार्यक्रममा विभिन्न १५ वटा सदस्य संस्थाका २२ जना प्रतिनिधिहरुको उपस्थिति रहेको थियो ।

कार्यक्रममा संघका महासचिव घनश्याम अधिकारी, सहायक कार्यकारी अधिकृत दुर्गा प्रसाद ढकाल, सम्बन्धित सेवा कार्यालयका प्रमुख र सदस्य साकोसका प्रतिनिधिबीच सहकारीका समसामयिक नीतिगत विषय, व्यवसाय विस्तार, साकोस अभियानको आगामी मार्गचित्र लगायतका विषयमा अन्तरक्रियात्मक छलफल भएको थियो । 

महासचिव अधिकारीले सहकारीका नीतिगत सबाल, समसामयिक समस्याहरु, प्राधिकरणद्वारा जारी मापदण्डले संघ/संस्थामा पार्ने प्रभाव साथै संघको अन्तरलगानी सेवा, स्तरीकरण कार्यक्रम, व्यवसाय विकास र लगानी प्रवर्द्धनका विषयमा आफ्ना विचारहरु राख्नुभएको थियो ।

मापदण्डका कारण बचत तथा ऋणको कारोबार गर्ने सहकारी संस्थाहरुमा पर्ने असहजताको समाधान खोज्न केन्द्रीय संघ नेफ्स्कूनको भूमिका महत्वपूर्ण रहने विषय अन्तरक्रियाका क्रममा सहभागी वक्ताहरुले जिज्ञासा राख्नुभएको थियो । 

सहायक कार्यकारी अधिकृत ढकालले सहकारी क्षेत्रको समसामयिक नियामकीय वातावरण, यसको प्रभाव र आगामी रणनीति सम्बन्धी प्राविधिक विषयहरु बारे जानकारी गराउनुभएको थियो । साथै सहकारी संस्थाहरूको सशक्तिकरण, लगानी प्रवर्द्धन मार्फत सदस्यहरुमा उद्यमशीलताको विकास साथै व्यवसाय प्रवर्द्धनमा सहयोग पुर्याउने उद्देश्य अनुरुप कार्यक्रम आयोजना गरिएको थियो ।