काठमाडौं । स्थानीय तहले सहकारीका ऋणी सदस्यहरुलाई सहकारीको ऋण समयमै चुक्ता नगरे कानूनी कारबाही गर्ने सूचना जारी गरेको छ । 

विराटनगर महानगरपालिकाले जेठ २९ गते बिहीबार यस्तै सूचना जारी गरी सहकारीका ऋणी सदस्यहरुलाई समयमै ऋण चुक्ता गर्न आग्रह गर्दै अन्यथा कानूनी कारवाही अघि बढाउने जनाएको छ । सहकारी संस्थाबाट लिएको ऋण तिर्ने जिम्मेवारी स्वयम् सदस्यकै हुने भएकोले सम्पूर्ण ऋणी सदस्यहरुलाई प्रचलित सहकारी ऐन, नियमावली, निर्देशिका एवम् मापदण्डको बर्खिलाप नहुने गरी जुन सम्झौता वा शर्त बमोजिम ऋण लिएको हो सो बमोजिम ऋणको सावाँ, व्याज लगायतका रकम सम्बन्धित सहकारी संस्थामा समयसीमाभित्रै चुक्ता गरी जिम्मेवार शेयर सदस्यको कर्तव्य पुरा गरी वित्तीय अनुशासन कायम गर्दै सहकारी संस्थाहरुको कारोबारलाई मर्यादित र पारदर्शी तवरले सुसञ्चालन गर्न सहयोग पुरÞ्याउन अनुरोध गरेको छ । 

साथै सहकारी संस्थाहरुलाई आफ्ना शेयर सदस्यहरुको बचत समयमै फिर्ता गर्न र ऋण तथा बाँकी बक्यौता असुली गर्ने तर्फ समेत थप क्रियाशील रहन ध्यानाकर्षण गराएको छ ।