सर्लाही । इश्वरपुरस्थित स्वस्तिक बचत तथा ऋण सहकारी संस्था लिमिटेडले आफ्नो २५औं वार्षिकोत्सव (रजत जयन्ती) विविध कार्यक्रमका साथ भव्य रूपमा सम्पन्न गरेको छ । 

संस्थाको २५ वर्षे यात्राको सफलताको उपलक्ष्यमा आयोजित कार्यक्रममा शिक्षा र स्वास्थ्य क्षेत्रमा केन्द्रित सामाजिक उत्तरदायित्व कार्यक्रम सार्वजनिक गरेको छ । सहकारीले नारायणी एकेडेमीसँग सहकार्य गरी आफ्ना सदस्यका बालबालिकालाई शिक्षा क्षेत्रमा विभिन्न छुट उपलब्ध गराउने जनाएको छ । विद्यालयसँगको सम्झौता अनुसार भर्ना शुल्कमा १०० प्रतिशत, मासिक शुल्कमा २५ प्रतिशत छुट दिइने साथै दलित सेयर सदस्यका १० जना बालबालिकालाई पूर्ण रूपमा मासिक शुल्क मिनाहा गरिने र आदिवासी जनजाति सदस्यका १० जना बालबालिकालाई ५० प्रतिशत छुट दिइने साकोसका व्यवस्थापक विनोद थापाले जानकारी गराउनुभयो । 

त्यसैगरि साकोसले स्वास्थ्य सेवाको पहुँच सरल बनाउने उद्देश्यले शुभ प्रिया हेल्थ केयरसँगको सहकार्यमा ओपिडी शुल्कमा ५० प्रतिशत, ल्याब परीक्षणमा ३० प्रतिशत, बेड शुल्कमा १० प्रतिशत र औषधिमा १० प्रतिशत छुट दिने व्यवस्था गरेको जनाएको छ ।

कार्यक्रममा संस्थापक अध्यक्ष बेनी बहादुर कार्कीलाई र संस्थापक उपाध्यक्ष स्व. चेतनाथ मैनालीलाई दोसल्ला ओढाएर सम्मान गरिएको थियो ।

साकोसका संस्थापक अध्यक्ष कार्कीले थोरै सदस्यबाट सुरु गरिएको संस्थाले हाल ३ हजार ६०० भन्दा बढी सेयर सदस्यमा वित्तीय सेवा पुर्याउन सफल भएको बताउनुभएको थियो । 

कार्यक्रममा नारायणी एकेडेमीका संचालक दुर्गानन्द झा र शुभ प्रिया हेल्थ केयरका संचालक डा. अशोक कुमार सर्राफ तथा डा. शुभ प्रिया साहलाई पनि कदरपत्र प्रदान गरिएको थियो । 

मधेस प्रदेशका श्रम तथा यातायात मन्त्री कौशल किशोर रायको प्रमुख आतिथ्यतामा सम्पन्न समारोहको अध्यक्षता संस्थाका अध्यक्ष विष्णुहरि मैनालीले गर्नुभएको थियो । कार्यक्रममा सहकारीका पदाधिकारी, पत्रकार, सेयर सदस्य लगायतको उल्लेखनीय उपस्थिति रहेको थियो ।