दोलखा । चरिकोटस्थित हाम्रो जनकल्याण बचत तथा ऋण सहकारी संस्था लि. ले विविध कार्यक्रम गरि २९ औं स्थापना दिवस मनाएको छ । स्थापना दिवसका अवसरका संस्थाका उत्कृष्ट उद्यमी सदस्य सम्मानबाट कल्पना बुढाथोकी, भगवती बस्नेत र भीम बहादुर बिकलाई तीन हजार नगद सहित सम्मान गरिएको छ । त्यसैगरी जेष्ठ नागरिक सम्मानबाट ९३ वर्षका बल बहादुर अधिकारी र ९२ वर्षका पदम कुमारी खडकालाई तीन हजार नगद सहित जेष्ठ नागरिक सम्मान गरिएको छ । साथै, हाम्रो जनकल्याण सञ्चारकर्मी फेलोशीप प्राप्त गर्ने पत्रकारहरुलाई प्रशंसा पत्र वितरण गरिएको छ । कार्यक्रममा सदस्यको उत्पादनलाई ब्रान्डिङ तथा प्याकेजिङ सम्बन्धि अन्तरक्रिया गरिएको थियो । 

सहकारीका सदस्यले उत्पादन गरेका वस्तुको बजारीकरणका लागि स्थानीय सरकार तथा व्यावसायिक निकायसँग साझेदारी गर्ने र सदस्यलाई समृद्ध बनाउने लक्ष्यका साथ हाम्रो जनकल्याणले उद्यमी सदस्यका लागि विभिन्न प्रोत्साहनमुलक कार्यक्रम सञ्चालन गर्दै आइरहेको छ । 

२९ औं स्थापना दिवसका अवसरमा आयोजित कार्यक्रममा शुभकामना मन्तव्य राख्दै प्रमुख अतिथि बागमती प्रदेश सभा सदस्य भरत बहादुर केसीले ग्रामीण नागरिकको जनजीविकासँग सहकारी प्रत्यक्ष जोडिएकाले बचतमात्र होइन उद्यमशीलताका लागि ऋण सुविधा लिने र ऋणको सही सदुपयोग गर्नुपर्ने बताउनुभयो । हाम्रो जनकल्याणले विगतदेखि नै सदस्यमैत्री गतिविधि सञ्चालन गर्दै आएको र स्थानीय तहसँग पनि साझेदारी गरी रचनात्मक गतिविधि सञ्चालन गरिरहेकाले त्यसको निरन्तरताका लागि बागमती प्रदेश सभा सदस्य केसीले आग्रह गर्नुभयो । त्यसैगरी बागमती प्रोस्कुनका बरिष्ठ उपाध्यक्ष जिवसराज खड्काले हाम्रो जनकल्याणको बचत तथा ऋणको मात्र नभई सदस्यहरुलाई उद्यमी बनाउने, सदस्यको उत्पादनलाई ब्रान्डिङ तथा प्याकेजिङ गर्ने र समृद्धिको यात्रामा सदस्यलाई जोड्ने योजना प्रशंसनीय भएकाले छाता संघहरुले त्यसमा आवश्यक सहयोग गर्ने बताउनुभयो । कार्यक्रममा भीमेश्वर नगरपालिकाका सहकारी शाखा प्रमुख नारायण सेढाइ, जिल्ला सहकारी संघका अध्यक्ष देवी प्रसाद शर्मा लगायतले शुभकामना मन्तव्य राख्नुभएको थियो ।

संस्थाका अध्यक्ष राजन श्रेष्ठले संस्थाको गतिविधिहरु नियमसंगत रुपमा सञ्चालन गरिएको र सदैव सदस्य सम्बन्ध बलियो बनाउदै हाम्रो जनकल्याण अघि बढेको बताउनुभयो । कार्यक्रममा संस्थाका प्रमुख कार्यकारी अधिकृत दिपक बस्नेतले उद्यमशीलता प्रबद्र्धन सम्बन्धी प्रस्तुती गर्दै संस्थाको आगामी लक्ष्य तथा रणनीतिका बारेमा जानकारी गराउनु भएको थियो । संस्थाका उपाध्यक्ष सहदेव खडकाले स्वागत मन्तव्य राख्दै संस्थाले सञ्चालन गरेका विभिन्न गतिविधिहरुका बारेमा जानकारी गराउनुभएको थियो ।

२०५४ साल बैशाख १७ गते स्थापना भएको हाम्रो जनकल्याण बचत तथा ऋण सहकारी संस्थामा हालसम्म ७ वटा विभिन्न सहकारी एकीकृत भएका छन् । ९ हजार ५ सय शेयर सदस्य रहेको संस्थाको कार्य क्षेत्र दोलखा जिल्ला भरी रहेको छ भने ८८ करोड ३७ लाख बराबरको सम्पत्ति तथा दायित्व रहेको छ ।